Չի կարելի լինել վարչապետ եւ միաժամանակ զբաղվել քարոզչությամբ: Այս մասին, ԱԺ-ում լրագրողների հետ զրույցում նշեց ՀՀԿ խմբակցության պատգամավոր Արմեն Աշոտյանը:
Նա հիշեցրեց, որ իրենց իշխանության ժամանակ իրենք ամեն ինչ անում էին, որ մինչեւ ժամը 18-ը վարչապետը մնա վարչապետ, իսկ դրանից հետո նոր զբաղվի քարոզչությամբ: «Նիկոլ Փաշինյանն ափաշքարա խախտում է ընտրական օրենսգիրքը առաջին իսկ օրվանից: Սա առաջին խախտումը չէ, մոտենում են իմ ընկերներին, որոնք հանդգնում են գալ իմ շտաբ, երեւի դրսում ԱԱԾ-ից մարդ կա, տեսնում են՝ ով է գալիս, հետո մոտենում են, ասում են՝ քեզ պե՞տք է, բա չես վախենում, որ գործից կհանեն եւ այլն: Հուշում են, որ չգան: Ի՞նչ է նշանակում մոտենալ իմ ընկերոջը, որ իմ նախընտրական ենթաշտաբների պետերից մեկն է, ու ասել, որ այլեւս չգա: Ի՞նչ է սա նշանակում»,-հայտարարեց Աշոտյանը:
Դիտարկմանը, թե ինչու հաղորդում չի տալիս պատկան մարմիններին, Աշոտյանն արձագանքեց. «Մենք երեկ հայտարարություն տվեցինք կուսակցության անունից: Ես կհետեւեմ ԿԸՀ-ի արձագանքին»: