Քաղաքական ուժերն ակտիվորեն օգտագործում են «սեւ» ու «սպիտակ» ուժերի գաղափարը: Այս մասին նոյեմբերի 21-ին լրագրողների հետ հանդիպման ժամանակ ասաց «Մարդկային զարգացման միջազգային կենտրոն» ՀԿ գործադիր տնօրեն Թեւան Պողոսյանը:
Փորձագետի խոսքով՝ քաղաքական ուժերից շատերը փորձում են իրենց նախընտրական քարոզարշավն անցկացնել այս գաղափեարն օգտագործելով: «Քարոզարշավն ըստ էության, սկսվել է ընտրություններին մասնակցող կուսակցությունների ցուցակների հրապարակումից հետո: Որոշ քաղաքական ուժերի ռազմավարությունը կառուցվում է այն բանի վրա, որ հենց ինքը կարող է վերցնել «սեւ» ուժերի ծանր բեռը եւ իշխանություններին այլընտրանք առաջարկել»,- նշեց նա:
Անդրադառնալով քաղաքական ուժերի միջեւ գաղափարախոսական պայքարի բացակայությանը՝ Թեւան Պողոսյանը նշեց, որ սա ստեղծված քաղաքական մշակույթի հետեւանքն է: «Քաղաքական վերնախավի գործառույթն է քաղաքացիների քաղաքական մշակույթի մակարդակի բարձրացումը: Սա կարելի է կատարել բանավեճերի ինստիտուտի ներդրման, քաղաքական ծրագրերի ներկայացման միջոցով, այլ ոչ թե ընտրությունները հանգեցնել փոխադարձ, երբեմն անձնական վիրավորանքների մակարդակին»,- եզրափակեց փորձագետը: