«Քաղաքացիական պայմանագիր» կուսակցության անդամ, «Ելք» խմբակցության պատգամավոր Ալեն Սիմոնյանը համաձայն չէ «Թրանսփարենսի ինթերնեյշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանի այն կարծիքի հետ, թե Նիկոլ Փաշինյանը, մարզեր այցելելով, վարչական ռեսուրսի չարաշահում է թույլ տալիս։
Այսօր՝ նոյեմբերի 22–ին, խորհրդարանում լրագրողների հետ զրույցում Ալեն Սիմոնյանը նշեց, որ Նիկոլ Փաշինյանը նշանակման առաջին իսկ օրվանից մարզեր է այցելել, իսկ օրենքով քարոզչություն իրականացնելը չի արգելվում. անձը կարող է քարոզչություն անել ընտրությունների նշանակման հաջորդ իսկ օրվանից։
«Օրենքը չի արգելում որեւէ մեկին զբաղվել քարոզչությամբ, յուրաքանչյուր ուժ կարող է մինչեւ պաշտոնապես քարոզչության սկսվելը զբաղվել քարոզչությամբ, իսկ պաշտոնական քարոզչությունը հավասար պայմաններ ստեղծելու համար է»,– ասաց նա։
Հարցին, թե ինչու է «Իմ քայլը» դաշինքը երթը կազմակերպում նոյեմբերի 24–ին եւ ոչ թե 25–ին, երբ պաշտոնապես մեկնարկում է քարոզարշավը, Ալեն Սիմոնյանը պատասխանեց. «Մենք ամսի 24–ից առաջ էլ ենք երթեր արել ու հետո էլ ենք անելու։ Իմ պաստառները շատ հնարավոր է՝ հայտնվեն ամսի 24–ին, որովհետեւ ֆիզիկապես չի հասցնի կազմակերպությունը այդքան շատ թեկնածուների պաստառները փակցնել»։