Ֆեյք տեղեկությունների ազդեցությունը հնարավոր է նվազեցնել լրատվամիջոցների որակյալ աշխատանքի հաշվին։ Այս մասին նոյեմբերի 22–ին լրագրողների հետ հանդիպման ժամանակ ասաց մեդիա–փորձագետ Սամվել Մարտիրոսյանը։
Նրա խոսքով՝ ֆեյք օգտատերերը փորձում են լրացնել այն դատարկությունը, որը թողնում են լրատվամիջոցները։
«Լրատվամիջոցները համացանցում պետք է ֆիլտրի դեր կատարեն, իսկ երբ դա տեղի չի ունենում, ֆեյք օգտատերերի համացանց նետածի պահանջարկը հաճույքով աճում է»,– նշեց Մարտիրոսյանը։
Փորձագետը նշեց, որ այսօր որոշ լրատվամիջոցներ ապատեղեկատվության դեմ պայքարելու փոխարեն, իրենք են հաճախ օգտագործում այն տեղեկությունները, որոնք տարածում են ֆեյք օգտատերերը՝ այն չստուգելով այլ աղբյուրներում։
Սամվել Մարտիրոսյանը հավելեց, որ Հայաստանում գրեթե 1000 ֆեյք օգտատերեր կան, չնայած չկա պաշտոնական վիճակագրություն, ինչպես նաեւ ապատեղեկատվության դեմ պայքարի մշակված սխեմաներ։
