Թեհրանը կարող է միջուկային գործարքի հանդեպ դիրքորոշումը փոխել, եթե Իրանի քաղաքացիները զգան, որ այն չի համապատասխանում իրենց տնտեսական շահերին: Այս մասին հայտարարել է Իրանի ԱԳ նախարար Մոհամմադ Ջավադ Զարիֆը, հայտնում է PressTV-ն:
«Մենք կողմնորոշվում ենք ժողովրդի դիրքորոշմամբ: Հենց այս գործոնն է առանցքային,- ասել է Զարիֆը: - Եթե Իրանի քաղաքացիները համարեն, որ գործարքը չի համապատասխանում իրենց տնտեսական շահերին, ապա մենք ստիպված կլինենք պատասխանել ժողովրդի կամքին»:
Իրանի ԱԳ նախարարը շեշտել է, որ Համատեղ համապարփակ գործողությունների ծրագրի շուրջ նոր բանակցություններն անիմաստ են: «Մենք ինչո՞ւ պետք է բանակցությունները վերականգնենք միայն այն պատճառով, որ ինչ-որ մեկն իր նախորդին ատում է»,- ասել է Զարիֆը՝ նկատի ունենալով ԱՄՆ նախագահ Դոնալդ Թրամփի անբարյացակամությունը Սպիտակ տան նախորդ ղեկավար Բարաք Օբամայի նկատմամբ, որի օրոք է կնքվել միջուկային համաձայնագիրը: Նա հավելել է, որ «դիվանագիտական մակարդակում այդպիսի պատճառը չի կարող բավարար համարվել, քանի որ դիվանագիտությունը լուրջ խաղ է»: