Հայաստանի կառավարությունը կշարունակի աջակցել տեղեկատվական տեխնոլոգիաների զարգացմանը: Այս մասին նոյեմբերի 23-ին 2018 թվականին «Տեղեկատվական տեխնոլոգիաների ոլորտում համաշխարհային ավանդի համար» Հայաստանի Հանրապետության պետական մրցանակի շնորհմանը նվիրված մամուլի ասուլիսի ժամանակ ասաց տրանսպորտի եւ տեղեկատվական տեխնոլոգիաների նախարարի պաշտոնակատար Հակոբ Արշակյանը:
Մրցանակի դափնեկիր Ջեյմս Թրաչարդին շնորհավորելով՝ Հակոբ Արշակյանը հիշեցրեց, որ տեղեկատվական տեխնոլոգիաների ոլորտը Հայաստանի կառավարության առաջնահերթություններից է:
«Կառավարությունը ձգտում է տեղեկատվական տեխնոլոգիաների զարգացմանն այնպիսի ոլորտներում, ինչպես՝ սկսնակ ընկերություններին աջակցությունը, կրթության եւ հետազոտությունների արդյունավետության բարձրացումը, ինչպես նաեւ Հայաստանի ՏՏ ոլորտում արտասահմանյան փորձի եւ ընկերությունների ներգրավումը»,- նշեց նախարարի պաշտոնակատարը:
Հակոբ Արշակյանի խոսքով՝ այս նպատակի համար կգործարկվի ինչպես պետության ներուժը, այնպես էլ Սփյուռքի, ինչպես նաեւ մասնավոր ներդրողների:
««Տեղեկատվական տեխնոլոգիաների ոլորտում համաշխարհային ավանդի համար» պետական մրցանակի շնորհումը շատ կարեւոր է համաշխարհային ՏՏ հանրույթում Հայաստանի իմիջի բարձրացման տեսանկյունից»,- նշեց նախարարի պաշտոնակատարը:
Նշենք, որ նախկինում «Տեղեկատվական տեխնոլոգիաների ոլորտում համաշխարհային ավանդի համար» մրցանակի դափնեկիրներ են դարձել աշխարհում առաջին միկրոպրոցեսորի՝ Intel 4004-ի «հայր» Ֆեդերիկո Ֆաջինը, Hitachi ընկերության նախկին գլխավոր տնօրեն Ցուգիո Մակիմոտոն, «Apple Computers»-ի հիմնադիր Սթիվ Վոզնյակը եւ ՏՏ ոլորտում հայտնի այլ անհատներ:
