ՌԴ ԱԳ նախարար Սերգեյ Լավրովը իր իրանցի գործընկեր Մոհամմադ Ջավադ Զարիֆի հետ քննարկել է միջուկային ծրագրի հետ կապված Համատեղ համընդգրկուն գործողությունների պլանին եւ սիրիական կարգավորմանն առնչվող հարցեր՝ տեղեկացնում է ՌԴ ԱԳՆ-ը։
Իրանը եւ միջնորդների վեցյակը (Ռուսաստան, ԱՄՆ, Բրիտանիա, Չինաստան, Ֆրանսիա, Գերմանիա) 2015թ․ հուլիսի 14-ին ձեռք էին բերել պատմական պայմանավորվածություն՝ Իրանի միջուկային զենքի խնդրի կարգավորման մասին։ Ընդունվել էր Համատեղ համընդգրկուն գործողությունների պլան, որի կատարումն Իրանի վրայից հանում էր նախկինում ՄԱԿ ԱԽ-ի, ԱՄՆ-ի եւ Եվրամիության սահմանած պատժամիջոցները։
Սակայն ԱՄՆ նախագահ Դոնալդ Թրամփը 2018թ․ մայիսին հայտարարեց, որ ԱՄՆ-ը միակողմանիորեն դուրս է գալիս պայմանագրից, քանի որ Իրանը չի կատարում իր պարտավորությունները։ Նա նաեւ հայտարարեց, որ Իրանի դեմ պատժամիջոցները վերականգնվում են եւ լրացուցիչ պաատժամիջոցներ են սահմանվում։
