Փոքր ու միջին ձեռնարկությունների զարգացման ազգային կենտրոնը եւ «Տուրիզմ Արմենիա» ասոցիացիան կհամագործակցեն պետություն-մասնավոր երկխոսության, Հայաստանում զբոսաշրջության ոլորտի խթանման եւ զբոսաշրջային արդյունքի զարգացման նպատակով։ Այս մասին այսօր փոխըմբռնման հուշագիր են ստորագրել ՓՄՁ ԶԱԿ հիմնադրամի գործադիր տնօրեն Արշակ Գրիգորյանը եւ «Տուրիզմ Արմենիա» ասոցիացիայի նախագահ Սյուզաննա Ազոյանը։ Հուշագրով նախատեսվում է, որ ՓՄՁ ԶԱԿ-ը տեխնիկական, տեղեկատվական եւ, իր հնարավորությունների սահմանում, այլ կարգի աջակցություն կցուցաբերի ասոցիացիային՝ զբոսաշրջության ոլորտի զարգացմանն ուղղված միջոցառումների իրականացման ընթացքում, կաջակցի մասնագետների համար վերապատրաստման եւ կրթական ծրագրերի կազմակերպմանը:
Փոխըմբռնման հուշագրի համաձայն, «Տուրիզմ Արմենիա» ասոցիացիան հնարավոր խնդիրների դեպքում կապահովի պետություն-մասնավոր երկխոսության հարթակ, ՓՄՁ ԶԱԿ-ին կաջակցի զբոսաշրջության ոլորտին առնչվող հետազոտություններ իրականացնելու հարցում, կներկայացնի ներգնա զբոսաշրջությունը եւ ներդրումները խթանող ծրագրեր՝ համաֆինանսավորման համար եւ այլն։