Վրաստանի ՆԳՆ-ն քննություն է սկսել վրացական «Փիրվելի» հեռուստաընկերության լրագրողի նկատմամբ հնարավոր ֆիզիկական վիրավորանքի փաստով: Այս մասին ճեպազրույցի ժամանակ հայտնել է երկրի ՆԳ փոխնախարար Նինո Ջավախաձեն, փոխանցում է «Նովոստի-Գրուզիան»:
Այսօր առավոտյան հեռուստաընկերությունը տեղեկություն է տարածել այն մասին, որ իրենց լրագրողի վրա 2 կանայք են հարձակվել: Դա տեղի է ունեցել մայրաքաղաքի Գլդանի շրջանից ուղիղ հեռարձակման ժամանակ, որտեղ մարդկանց ընտրական տեղամասեր են բերել ավտոբուսներով: Միջադեպից անմիջապես հետո ուղիղ հեռարձակումն ընդհատվել է:
«Ոստիկանությունը քննություն է սկսել հնարավոր հանցագործությունների 4 փաստով, այդ թվում՝ Թբիլիսիի ընտրական տեղամասերից մեկում «Փիրվելիի» լրագրողի նկատմամբ ֆիզիկական վիրավորանքի»,- հայտնել է Վրաստանի ՆԳ փոխնախարարը:
Ջավախաձեի խոսքով՝ գերատեսչությունը նաեւ քննում է Մցխեթիում եւ Բաթումիում ընտրական տեղամասերում տեղի ունեցած միջադեպերը: Բռնության մեջ են մեղադրվում ինչպես ընդդիմության, այնպես էլ իշխող «Վրացական երազանք» կուսակցության ներկայացուցիչները:
«Ռուսթավի 2» հեռուստաընկերությունն այսօր առավոտյան տեղեկություն է տարածել մի քանի ընտրական տեղամասերում մեծ քանակությամբ ոստիկանական տեխնիկայի եւ կենդանի ուժի կենտրոնացման մասին: Ցուցադրվել են նաեւ ավտոբուսների կադրեր, որոնցում հատուկ հանդերձանքով ոստիկաններ էին:
Ջավախաձեի խոսքով՝ անվտանգության միջոցառումներն ուժեղացվել են միայն այն նպատակով, որպեսզի քվեարկության օրը խաղաղ եւ հանդարտ իրադրություն ապահովեն:
«Մեկ անգամ եւս հայտնում ենք, որ ՆԳ նախարարությունը պատասխանատու է անվտանգության եւ իրավակարգի պահպանման համար: Մենք ակտիվ գործողությունները շարունակում ենք, երկրի մասշտաբով ոստիկանական ուժերի տեղաբաշխումը կշարունակվի ամբողջ օրը»,- եզրափակել է նա:
Երկրի նախագահական ընտրությունների երկրորդ փուլին մասնակցում է երկու թեկնածու: 5-րդ համարն է «Ուժը միասնության մեջ է» ընդդիմադիր միավորումը ներկայացնող «Միասնական ազգային շարժում» կուսակցության անդամ Գրիգոլ Վաշաձեն, իսկ 48 համարն է Սալոմե Զուրաբիշվիլին, ում աջակցում է իշխող «Վրացական երազանք» կուսակցությունը:
Երկրի տարածքում ընտրական տեղամասերը բացվել են Թբիլիսիի ժամանակով 08:00-ին եւ կփակվեն 20:00-ին: Արտասահմանում քվեարկությունը կտեւի մինչեւ 24:00: