Ա1+-ը Հեռուստատեսության եւ ռադիոյի ազգային հանձնաժողովի դեմ նոր դատական հայց է նախապատրաստում. հայցը վարչական դատարան կներկայացվի առաջիկա երկուշաբթի:
Դատական հայցը երկու պահանջ է ներառում`ճանաչել «Ա1+»-ի հիմնադիր «Մելտեքս» ընկերության խախտված իրավունքները եւ չեղյալ համարել թվային ցանցով եթերային հեռարձակման մրցույթում «Արմնյուզ» հեռուստաընկերությանը հաղթող ճանաչելու մասին որոշումը:
«Արմնյուզի» մրցակից «Ա1+» հեռուստաընկերության փաստաբան Տիգրան Տեր-Եսայանն այսօր հայտարարել է, որ ՀՌԱՀ-ը կողմնակալություն է ցուցաբերել եւ խախատել է «Ա1+»-ի իրավունքները: Նա իր խոսքը հիմնավորել է ՀՌԱՀ-ից ստացած մի շարք փաստաթղթերում առկա հակասություններով:
«Ա1+»-ին եթեր չտրամադրելու որոշումը ՀՌԱՀ-ն կայացրել էր 2010 թվականի դեկտեմբերի 10-ին: Ավելի քան 8 տարի առաջ եթերազրկված «Ա1+»-ը 13-րդ անգամ էր մասնակցում հեռուստահեռարձակման լիցենզավորման մրցույթին: Դեկտեմբերին կայացած միեւնույն մրցույթում պարտություն էր կրել եւ եթերազրկվել էր նաեւ ԱԼՄ հեռուստաընկերությունը: