ՀՀ կառավարությունն այսօրվա՝ նոյեմբերի 29-ի իր նիստում որոշում կայացրեց փոփոխություն կատարել կառավարության համապատասխան որոշման մեջ, որով նախատեսվում է կանոնակարգել սահմանամերձ 37 բնակավայրերում փաստացի հողօգտագործողներին աշնանացան հացահատիկային մշակաբույսերի ցանքի համարպետական աջակցություն հատկացնելու հետ կապված հարաբերությունները:
Գյուղատնտեսության նախարարի պաշտոնակատար Գեղամ Գեւորգյանը նշեց, որ որոշմամբ նախատեսվել է պետական աջակցություն ցուցաբերել միայն գյուղատնտեսությամբ զբաղվող ֆիզիկական անձանց` սեփականության կամ համայնքային հողերի վարձակալության իրավունքը հաստատող փաստաթղթի հիման վրա։
«Մինչդեռ առկա են հողօգտագործողների կողմից առանց սեփականության կամ վարձակալության իրավունքի հողի փաստացի օգտագործման դեպքեր, մեծամասամբ Տավուշի մարզում, ուստի անհրաժեշտություն է առաջանում տվյալ հողօգտագործողներին պետական աջակցություն տրամադրել համայնքի ղեկավարի կողմից տրված տեղեկանքի հիման վրա։
Միաժամանակ հաշվի առնելով, որ պետական աջակցության տրամադրման ժամկետ է սահմանվել մինչև 2018 թվականի դեկտեմբերի 20-ը, ուստի իրատեսական է ընտրանքային մոնիթորինգը կատարել հողօգտագործողների թվի 3 տոկոսի չափով։
Ակնկալվում է, որ սահմանամերձ 37 բնակավայրերում հողօգտագործողների համար հավասար պայմանների ստեղծում, վարելահողերի օգտագործման մակարդակի բարձրացում, չմշակվող հողատարածքների օգտագործում, ցանքատարածությունների, համախառն արտադրանքի ավելացում, գյուղացիական տնտեսությունների եկամուտների բարձրացում:
Ներմուծված աշնանացան հացահատիկային մշակաբույսերի ծավալների կրճատում, ինքնաբավության մակարդակի բարձրացում:
Խոսքը վերաբերում է 900 շահառուի, որոնք չունեն փաստաթղթեր, իսկ ընդհանուր շահառուների քանակը մոտ 3 հազար է»,-ասաց նախարարի պաշտոնակատարը:
