Երկու օր առաջ, երբ ոմանք ինձ մեղադրեցին, որ եկել եմ, Ղարաբաղը վաճառում եմ, ելույթ ունեցա դրա հետ կապված՝ հիմնավորելու համար, որ Հայաստանում ավելի պրոհայկական եւ պրողարաբաղյան դիրքորոշում ունեցող կառավարություն երբեք չի եղել։ Այս մասին այսօր՝ նոյեմբերի 29–ին, ասաց վարչապետի պաշտոնակատար Նիկոլ Փաշինյանը՝ ճամբարակցիների հետ հանդիպման ժամանակ։
Փաշինյանն ասաց, որ այդ ժամանակ նշել է, որ Հայաստանի առաջին ղեկավարն է, ում որդին զինվորական ծառայություն է անցնում ԼՂՀ–ում։ Նա նշեց, որ երեկ երեկոյան, երբ ուսումնասիրել է՝ թե ինչ է տեղի ունենում համացանցում, զարմանքով տեսել է, որ իր այդ հայտարարությունների վերաբերյալ իր համար անհասկանալի վերնագրեր են՝ «Շահարկումներ։ Էժան շահարկումներ։ Ինչպե՞ս կարելի է այդպես ասել...»։
«Ընդհանրապես վերջին օրերին, անկեղծ ասած, լավ չեմ հասկանում Լեռնային Ղարաբաղի իշխանության ներկայացուցիչների ակտիվությունը, բացարձակապես չեմ հասկանում, ինչի՞ են ակտիվացել և ինչի՞ են փորձում որեւէ ձեւով խառնվել և իրենց ներկայությունը ցույց տալ Հայաստանի խորհրդարանի ընտրությունների քարոզարշավի ընթացքում: Ասեմ, որ շատ հարցեր ունեմ դրա կապակցությամբ, և այդ հարցերն անպայման կքննարկեմ ԼՂՀ նախագահ Բակո Սահակյանի հետ, իսկ մինչ այդ պարոն Բակո Սահակյանին հորդորում եմ կարգի հրավիրել իր կառավարության ներկայացուցիչներին և ուղարկել իրենց աշխատանքը կատարելու։ Եվ առիթ անառիթ իրենց մեկնաբանություններով թող... Չհասկացա, ուրեմն Ղարաբաղի նախագահի մամուլի խոսնակը օր ու մեջ իմ ասածների վերաբերյալ մեկնաբանություններ է տալիս, այ քեզ բան... Բա պատկերացնո՞ւմ եք՝ իմ մամուլի խոսնակը Ղարաբաղի հայտնի և անհայտ իրադարձությունների վերաբերյալ սկսի մեկնաբանություններ տալ, հասկանո՞ւմ եք՝ դրա հետեւանքն ու արդյունքը ինչ կլինի: Սթափվե՛ք և զբաղվե՛ք ձեր աշխատանքով, իհարկե ինչ տեղի է ունեցել, ձեզ հետ կքննարկեմ, բայց ընտրություններից հետո, իսկ մինչ այդ ասում եմ՝ զբաղվեք ձեր գործով»,- հորդորեց Փաշինյան։
«Ասում են՝ վայ, նախընտրական շահարկում, Ռոբերտ Քոչարյանի որդիները… Ի՞նչ Ոոբերտ Քոչարյանի որդիները, ես պաշտոնական տեղեկանք եմ ուզել Ռոբերտ Քոչարյանի որդիների ծառայության վերաբերյալ, ասում եմ՝ Ռոբերտ Քոչարյանի որդիները ծառայել են Երևանում: Ոչ մի գիշեր չեն անցկացրել որեւէ զորամասում, ծառայել է ՊՆ վարչական մասում, մյուս որդին էլ ծառայել է որպես վարորդ, պետական ավտոն դրել են տակը, ուր ուզել գնացել է, պետության բենզինի, ավտոյի հաշվին և այլն: Էդ ինչի՞ եք ոգեւորվել։ Ես գիտեմ՝ ինչ եմ ասում, եւ եթե որեւէ մեկն իմ ասածը կասկածի տակ դնի թղթերով ու փաստաթղթերով կապացուցեմ»,– ասաց Փաշինյանը: