Կորեական ժողովրդական բանակի (ԿԺԲ, Հյուսիսային Կորեայի զինված ուժեր) զինվորը սահմանին փախել է հարավկորեական կողմ, փոխանցում է ՏԱՍՍ-ը՝ վկայակոչելով Հարավային Կորեայի Շտաբների պետերի կոմիտեին (ՇՊԲ):
«Համապատասխան մարմինները մտադիր են քննություն անցկացնել, թե նա ինչպես է հարավ անցել»,- նշված է գերատեսչության հաղորդագրության մեջ: ՇՊԲ տեղեկություններով՝ հյուսիսկորեական կողմը ի պատասխան ոչ մի «անսովոր գործողություն» չի ձեռնարկում:
Նշվում է, որ զինվորը սահմանը հատել է տեղական ժամանակով 7:56-ին եւ հայտնաբերվել է հսկող սարքով: Ներկայումս նա ձերբակալված է եւ անվտանգության մեջ է:
Սա ԿԺԲ զինծառայողի հարավ փախուստի առաջին դեպքն է այն բանից հետո, երբ նոյեմբերի 30-ին Հարավային եւ Հյուսիսային Կորեաները ապառազմականացված շրջանում հանել էին 10 դիտակետերը, կրճատել այնտեղ գտնվող անձնակազմը եւ դուրս բերել ծանր սպառազինությունը: Այս միջոցառումներն ուղղված են վստահելի հարաբերությունների ստեղծմանը եւ սահմանին պատահական բախումների կանխմանը:
Նախորդ փախուստը տեղի էր ունեցել անցյալ տարվա նոյեմբերի 13-ին: Այդ ժամանակ ԿԺԲ զինվորը առեւանգած մեքենայով ներխուժել էր Փհանմունջոմի սահմանապահ կետ եւ ինքնաձիգի կրակահերթի տակ վազել հարավային կողմ՝ ստանալով ծանր վիրավորում: Հարավկորեացի բժիշկները կարողացել էին նրա կյանքը փրկել, ներկայումս նա նոր անունով բնակվում է Հարավային Կորեայում: