Կան ուժեր, որոնք փորձում են կնճիռներ ստեղծել հայ-իրանական հարաբերություններում։ Այս մասին այսօր՝ դեկտեմբերի 1-ին, Իրանին սահմանակից Սյունիքի մարզի Կապան քաղաքում, նախընտրական քարոզարշավի ժամանակ ասաց «Իմ քայլը» դաշինքի առաջնորդ, ՀՀ վարչապետի պաշտոնակատար Նիկոլ Փաշինյանը։

«Հայաստանի եւ Իրանի միջեւ հարաբերությունները մշտապես գտնվել են բարձր  մակարդակի վրա, այսօր էլ գտնվում են բարձր մակարդակի վրա եւ մենք ամեն ինչ պետք է անենք, որ դրանք շարունակեն գտնվել բարձր մակարդակի վրա։ Իրանի եւ Հայաստանի հարաբերություններում, բարեբախտաբար, կնճիռներ չկան բայց նաեւ պետք է հասկանալ, որ քիչ չեն այն ուժերը, որոնք ստեղծում են այդ կնճիռները։ Ես ուզում եմ հույս եւ համոզմունք հայտնել, որ եւ Հայաստանի կառավարությունը եւ  Իրանի կառավարությունը կձեռնարկեն բոլոր միջոցները եւ կապահովեն Հայաստան-Իրան հարաբերությունների նորմալ զարգացում։ Դա մեր կառավարության համար իսկապես առաջնահերթություն է եւ մենք ամեն ինչ անելու ենք այդ նպատակին հասնելու համար»,- ասաց նա։

Փաշինյանի խոսքով՝ բոլորին հայտնի է, որ Իրանի շուրջ բավականին լարված իրավիճակ է ստեղծվել։

«Եւ մենք համոզված ենք, որ ցանկացած խնդիր պետք է լուծվի բանակցությունների միջոցով, առանց ուժի կամ ուժի սպառնալիքի կիրառման եւ առանց հարկադրանքի։ Մենք հույս ունենք, որ իրադարձությունները կզարգանան հենց այդ ճանապարհով։ Մինչ այդ մենք միջոցներ ենք ձեռնարկում Իրանի հետ մեր հարաբերությունները բնականոն զարգացնելու համար եւ առաջիկայում Եվրամիության ֆինանսավորմամբ վերակառուցվելու է Իրանի հետ սահմանային անցակետը»,- ասաց Փաշինյանը։

Անդրադառնալով Կապան-Երեւան մայրուղուն Փաշինյանը նկատեց, որ այն այս մի քանի ամիսների ընթացքում անտանելիից դարձել է մի քիչ տանելի, սակայն անթույլատրելի է միջազգային նշանակության ճանապարհը թողնել նման վատ վիճակում։ Փաշինյանը նշեց, որ իրենց ռազմավարության  կետերից մեկն է այս ճանապարհի վերանորոգումը։