ԱՄՆ-ի գլխավորած կոալիցիան Սիրիայում չեզոքացրել է «Իսլամական պետություն» ահաբեկչական խմբավորման ղեկավարներից մեկին, հայտնում է Fox News-ը՝ վկայակոչելով կոալիցիայի ներկայացուցիչ Շոն Ռայանի հայտարարությունը:
Հեռուստաալիքի տեղեկություններով՝ Աբու ալ Ումարայնը ներգրավված էր 2014 թվականին ԱՄՆ բանակի նախկին շարքային Պիտեր Քեսիգի սպանության գործում: ԻՊ ղեկավարը սպանվել է կիրակի Սիրիական անապատում անօդաչուով հարվածի հետեւանքով: Ոչնչացվել էին նաեւ ահաբեկչական կազմակերպության մի քանի անդամներ:
ԱՄՆ բանակի նախկին շարքային Պիտեր Քեսիգը, որին գրոհայինները Սիրիայում գերեվարել էին 2013 թվականի հոկտեմբերին, ծագումով Նիդեռլանդներից էր։ Նա Սիրիայում հումանիտար կազմակերպություններից մեկի աշխատակիցն էր եւ զբաղվում էր սննդամթերք ու դեղորայք տարածելով:
Քեսիգը, որը նախկինում ԱՄՆ ռազմական խմբավորման կազմում ծառայել էր Իրաքում, նաեւ բուժեղբոր գործ էր սովորել եւ սիրիացի փախստականներին սովորեցնում էր վնասվածքների դեպքում առաջին բուժօգնություն ցույց տալ: Սիրիայում գտնվելու ժամանակ Քեսինգն իսլամ էր ընդունել եւ նոր անուն ստացել՝ Աբդուրռահման: