Այս ընթացքում շատ է եղել, որ ինչ-որ աղմկոտ քրգործով մարդ է ձերբակալվել, հետո մեղադրյալն ազատ է արձակվել դատարանի որոշմամբ: Այս մասին Արարատ քաղաքում քարոզարշավի ընթացքում բնակիչների հետ հանդիպման ժամանակ նշեց վարչապետի պաշտոնակատար, «Իմ քայլը» դաշինքի ցուցակը գլխավորող Նիկոլ Փաշինյանը:
Նրա խոսքով, մարդկանց մեջ եղել է խոսակցություն, ոմանք փորձել են տպավորություն ստեղծել, թե դա շոու էր, բռնեցին, պայմանավորվեցին, բաց թողեցին: «Ես ուզում եմ բոլորիդ աչքերի մեջ նայելով ուղիղ ասել՝ կոռուպցիայի դեմ պայքարում որեւէ անսկզբունք կոմպրոմիս չի լինելու: Բացառված է, որ մենք ժողովրդի թիկունքում գործարք կնքենք որեւէ հարցի վերաբերյալ: Թալանված գումարները պետք է կոպեկ-առ կոպեկ հետ բերվեն: Երբեք չհավատաք որեւէ լուրի, որ մենք որեւէ կոռուպցիոների հետ ինչ-որ բան պայմանավորվել ենք ժողովրդի թիկունքում ու կոռուպցիայի դեմ պայքարը կանգնել է»,-ասաց Փաշինյանը:
Նա խոսեց նաեւ անցումային արդարադատության մասին՝ նշելով. «Մենք պետք է նաեւ հասկանանք, որ այս հեղափոխության պրոցեսի արդյունքում մեր բոլոր պետական մարմինները փոխվել են: Այսօր դատական համակարգը գործում է կառավարությունից անկախ եւ ես դա երաշխավորում եմ, ու դա վատ չէ: Բայց մենք ունե՞նք արդյոք երաշխիքներ, որ այդ նույն դատական համակարգը գործում է նախկին տերերից անկախ: Սկզբունքորեն պիտի որ ազդեցության լծակներ չլինեն, բայց մենք նաեւ հասկանում ենք, որ ըստ էության, այսօրվա պաշտոնյաների մոտ 90 տոկոսը նշանակված են նախորդ համակարգի կողմից:
Մենք խնդիր ենք դրել առաջիկա 5 տարիների ընթացքում մեր ԶՈՒ կարիքների համար ծախսել հավելյալ 2,5 մլրդ դոլար, եւ դա պետք է վճարեն ձեզ հայտնի կոռուպցիոներները: Եթե նրանք դա կանեն կամավոր, մենք հաշվի կառնենք, որ արել են կամավոր, բայց դա չի նշանակում, որ ամբողջ թալանվածն է:
Շատ կարեւոր է, որ կարողանանք գնահատել, թե որքան գումար է գողացվել եւ որքան պետք է վերադարձվի: Սա հեշտ աշխատանք չէ: Չափազանց կարեւոր է, որ որեւէ մեկը քրեական հետապնդման չենթարկվի չհիմնավորված: Հայաստանում քաղբանտարկյալներ չպետք է լինեն:
Նոր ԱԺ-ն կարող են լինել օրենսդրական փոփոխություններ, կարող է անցումային արդարադատության որոշակի տարրեր ներդնենք: Մենք պետք է մշակենք պատրաստ բանաձեւեր, ենթադրենք առանց որեւէ քրգործի հարուցման, որովհետեւ քրգործը հարուցվում է կոնկրետ դեպքերով:
Ասենք, մեկը ներկայանում է քննչական մարմիններին ու հայտարարում, որ էսքան չարաշահում եմ թույլ տվել, գողացել եմ այսքան գումար, այսքան գումար պատրաստ եմ վերադարձնել: Նման դեպքերում ի՞նչ ենք անում: Այս հարցը պետք է քննարկենք առաջիկա Ազգային ժողովում: Մի կողմից հանրությունը մեր առջեւ պահանջ է դնում, որ մենք արդյունավետ լինենք կոռուպցիայի դեմ պայքարում, մյուս կողմից իրավական ընթացակարգերը թույլ չեն տալիս, որ լինենք բավարար չափով արագ»: