Մենք խորհրդարան ենք գնում երկու տարվա ծրագիր ներդնելու համար՝ մինչեւ հաջորդ արտահերթ ընտրությունները: Դեկտեմբերի 4-ին Ծովագյուղում ընտրողների հետ հանդիպմանն այս մասին ասաց «Սասնա ծռեր» կուսակցությունից պատգամավորի թեկնածու Վարուժան Ավետիսյանը:
Նրա խոսքով, կոնկրետ խնդիրների լուծման համար անհրաժեշտ է վերականգնել արհմիությունները: Ավետիսյանը նաեւ նշեց, որ անհրաժեշտ է անվտանգության ոլորտում արմատական բարեփոխումներ կատարել:
«Անհրաժեշտ է վարչական-տնտեսական գոտի ստեղծել փորձառու զինյալների ներգրավմամբ` այդ գոտիների պաշտպանությունը կազմակերպելու համար», - բացատրեց նա:
Պատգամավորի թեկնածուն ավելացրեց, որ անհրաժեշտ է ազատվել անարդյունավետ անվտանգության համակարգից, որի պատճառով սահմանամերձ գյուղերի բնակիչները հայտնվում են թշնամու ձեռքում:
Հիշեցնենք, որ առաջիկա կիրակի Հայաստանում կանցկացվեն արտահերթ խորհրդարանական ընտրություններ: