Հունգարիայի վարչապետ Վիկտոր Օրբանը վերահսկողության տակ է առել երկրի ԶԼՄ-ների մեծ մասը՝ գրում է The New York Times-ը։

NYT-ը նշում է, որ վերջին ժամանակներս իշխանամետ օլիգարխները եւ Օրբանի դաշնակիցները գնում են ԶԼՄ-ները եւ դրանք դարձնում են իշխանական խոսափող, եւ դա հիշեցնում է խորհրդային գործելաոճը։

Թերթը նշում է, որ ամռանը ստեղծված ԶԼՄ-ների կենտրոնաեվրոպական հիմնադրամը եւս դարձրել են Օրբանի դաշնակիցը։ Հիմնադրամի կառավարիչ Միկլոշ Շանտոն ընդգծել է, որ հիմնադրամը կաշխատի Հունգարիայում «հավասարակշռված» լրատվական դաշտ ստեղծելու ուղղությամբ, որը հակակշիռ կլինի «առաջադեմ» լրատվական հրատարակություններին։ Սա, ըստ NYT-ի հավասարակշռման շատ տարօրինակ տեսակետ է, քանի որ ներկայում երկրի ավելի քան 500 լրատվամիջոցներ իշխանամետ են, իսկ 2015թ․ դրանց թիվը 31 էր։

Անկախ լրատվամիջոցներին տարիներով մերժել են պետական գովազդ տրամադրել՝ դրանց դարձնելով գրավիչ Օրբանի կողմնակից հանդիսացող պոտենցիալ գնորդների համար։ 2016թ․ փակվել է Հունգարիայի ամենակարդացվող Nepszabadsag ընդդիմադիր թերթը։

Բացի այդ, ագրեսիվ գործողություններ են կատարվել ժողովրդավարական ինստիտուտների հանդեպ։ Օրբանի նման վարքագիծը, գրում է թերթը, կարող է երկրին զրկել Եվրոպական միությունում ձայնի իրավունքից։