Աշխարհում ահաբեկչության զոհերի թիվը 2014 թ.-ի ամենաբարձր ցուցանիշի համեմատ նվազել է 44 տոկոսով եւ 2017-ի տվյալներով կազմել 18.8 հազար մարդ: Այս մասին ասվում է «Ահաբեկչության համաշխարհային ինդեքս» զեկույցում, որը չորեքշաբթի Լոնդոնում ներկայացրել է Տնտեսագիտության եւ Խաղաղության ինստիտուտը (The Institute for Economics and Peace):
Զեկույցի հեղինակները նշում են, որ ահաբեկիչների կողմից սպանվածների թիվը երրորդ տարին անընդմեջ նվազում է: Որպես հիմնական պատճառներից մեկը, նրանք նշում են Իրաքում եւ Սիրիայում ԻՊ ահաբեկչական խմբավորման շարունակական թուլացումը, որտեղ բացարձակ ցուցանիշները առավել շոշափելի դրական արդյունք են ցույց տալիս: Սիրիայում ահաբեկիչների կողմից սպանվածների թիվը տարվա ընթացքում գրեթե կիսով չափ կրճատվել է. 2017 թվականին՝ 1.1 հազար զոհ 2016 թ. 2.1 հազար եւ 2015 թ. 2.7 հազարի դիմաց: Իրաքում 2017 թ.-ին մոտ 4,5 հազար մարդ է սպանվել՝ մեկ տարի առաջ գրեթե 9,8 հազարի համեմատ:
«Սիրիայի ցուցանիշները մենք կապում ենք ԻՊ դեմ ուղղված ռազմական գործողությունների հետ եւ ակնկալում, որ այս միտումը շարունակվելու է: ԻՊ-ն ավելի շատ տարածքներ եւ ֆինանսավորման աղբյուրներ է կորցնում:
Միեւնույն ժամանակ, 2017-ին ԻՊ-ն շարունակել է լինել ամենաակտիվ ահաբեկչական խմբավորումը, իսկ Ջեբհաթ ալ-Նուսրան երկրորդ տեղն է զբաղեցնում, որը նույնպես մեծ թվով հարձակումներ է իրականացրել», - ՏԱՍՍ-ին տված հարցազրույցում ասել է Տնտեսագիտության եւ Խաղաղության ինստիտուտի հիմնադիր, գործարար Սթիվ Քիլլելեան:
«Ահաբեկչության դեմքը փոխվում է: Որոշ խմբավորումներ անհետանում են, բայց մշտապես հայտնվում են նորերը: 2017-ին, ըստ մեր հաշվարկների, աշխարհում ահաբեկչական հարձակումներ իրականացվել է 169 խմբավորման կողմից, որոնցից 42-ը կամ նոր կազմակերպություններ են կամ վերջին երեք տարիներին առանց մարդկային զոհերի հարձակումներ կատարած խմբեր», - հավելել է նա:
Զեկույցում նշվում է, որ 2017 թ. գլոբալ ահաբեկչությունը համաշխարհային տնտեսությանն արժեցել է 52 մլրդ դոլար, ինչը 42 տոկոսով քիչ է, քան մեկ տարի առաջ: Մարդկային զոհերով ահաբեկչական հարձակումները կատարվել են աշխարհի 67 երկրներում: Ուշադրության է արժանի ԱՄՆ-ում եւ Արեւմտյան Եվրոպայում աջ արմատական արմատականների կողմից կատարված ահաբեկչական գործողությունների քանակի աճը: 2013-ից մինչեւ 2017 թվականը այնտեղ կատարված հարձակումների թիվը հասել է 127-ի, զոհերի թիվը՝ 66 է (2017-ին 17 մարդ սպանվել է):
