Չեմ կարծում, որ Նիկոլ Փաշինյանն ամեն օր մտածում է՝ ոնց անի, որ Արցախը հանձնի, բայց այն ներկայից կառավարության գործունեությունն աստիճանաբար բերելու է արցախյան հիմնախնդրի լուծման գործընթացում մեր դիրքերի թուլացմանը եւ անվտանգության առումով ռիսկերի ավելացմանը: Այդ մասին այսօր՝ դեկտեմբերի 5-ին, ասուլիսի ժամանակ ասաց ՀՀԿ ցուցակով առաջադրված թեկնածու, ՊՆ նախկին փոխնախարար Արտակ Զաքարյանը:
«Ստեղծելով չհիմնավորված խնդիրներ ՀԱՊԿ-ում, անհասկանալի խնդիրներ ստեղծելով հարեւան երկրների հետ՝ ելնեով ուրիշի շահերից, ՌԴ-ի հետ երկխոսությունը վերածել են անվստհության մթնոլորտի՝ մենք կունենանք անհասկանալի օրակարգ արտաքին հարաբերություններում»,- նշեց Զաքարյանը:
Ըստ Զաքարյանի՝ ներկայիս իշխանությունները հայտարարել են, որ շարունակում են ՀՀԿ-ի գիծը արտաքին քաղաքակնությունում, բայց դա ընդամենը հայտարարություն է: «Շարունակելով այդ գիծը՝ իրականության մեջ ներկայիս իշխանությունները ավելի քարքարոտ ու բարդ են դարձնում արտաքին հարաբերությունների ճանապարհը: Օրինակ, ԵՄ-ի հետ Համապարփակ եւ ընդլայնված համագործակցության պայմանագիրը, վերջինը երկիրը ստորագրել է հունիսի 29-ին, դրանից հետո որեւէ երկիր չի ստորագրել այդ փաստաթուղթը, մինչդեռ մինչեւ այդ շաբաթը մի երկիր ստորագրում էր: Փաստաթուղթը վավերացրել է ընդամենը վեց երկիր: 22 երկիր նստած սպասում են, որ հասկանան՝ ինչ է կատարվում Հայաստանում: Մենք ամեն շաբաթ տեսնում ենք սկանդալային կամ կիսասկանդալային իրավիճակ արտաքին հարաբերություններում, որը մեզ ոչինչ չի տալիս»:
