Հայաստանում լավ օրենսդրական բազա կա սննդամթերքի արտադրման եւ որակի վերահսկման համար, սակայն այն դեռեւս չի նպաստում արտադրանքի որակի բարձրացմանը: Դեկտեմբերի 5-ին լրագրողների հետ հանդիպաման ժամանակ այս մասին ասաց Հայաստանի Սպառողների ազգային ասոցիացիայի փոխնախագահ Ռուբեն Հայթյանը:
Նրա խոսքով՝ հասարակական կազմակերպություններն ի վիճակի չեն համակարգային մակարդակում լուծելու արտադրանքի որակի խնդիրը: «Սննդամթերքի որակի վերահսկումը պետք է կատարի Հայաստանի Սննդամթերքի անվտանգության պետական ծառայությունը: Հասարակական կազմակերպությունները կարող են սոսկ պետական կառույցներին իրազեկել խախտումների մասին»,- նշեց նա:
Անդրադառնալով տարբեր ձեռնարկություններում եւ խանութներում մոնիթորինգի արդյունքներին՝ փորձագետը շեշտեց, որ խախտումներ են հայտնաբերվել հացաբուլկեղեն, կաթնամթերք արտադրող ձեռնարկություններում, ինչպես նաեւ սննդի կետերում ու ռեստորաններում:
«Խախտումները վերաբերում են, մասնավորապես, սննդամթերքի մակնշմանը (տեքստի մանր տառատեսակ, հայերենով մակնշման բացակայություն): Առանձնապես կոպիտ խախտումներ են հայտնաբերվել կաթնամթերքի արտադրության ոլորտում, օրինակ՝ երբ թթվասերի փոխարեն այլ արտադրանք է վաճառվում, ընդ որում՝ բաղադրության մեջ բուսական ծագման վնասակար յուղերի պարունակությամբ»,- նշեց Ռուբեն Հայթյանը: