2019 թվականին Եվրամիությունը ինովացիոն տեխնոլոգիաների զարգացումը խթանելու ծրագրի շրջանակում մտադիր է Հայաստանում մասնավոր հատվածի ներկայացուցիչներին 60 մլն եվրոյի դրամաշնորհ հատկացնել: Դեկտեմբերի 5-ին մամուլի ասուլիսի ժամանակ այս մասին հայտնեց Հայաստանում ԵՄ պատվիրակության համագործակցության հարցերով բաժնի ղեկավար Գոնզալո Սերանոն:
Նրա խոսքով՝ ԵՄ-ն մտադիր է Հայաստանում իրականացնել «Եվրամիությունը հանուն ինովացիաների» լայնամասշտաբ ծրագիրը, որն ուղղված է երկրում ինովացիոն տեխնոլոգիաների խթանմանը: ԵՄ-ի եւ Հայաստանի կառավարության միջեւ համագործակցության մասին համապատասխան համաձայնագիրը կստորագրվի այս տարվա դեկտեմբերին: Առաջիկայում նաեւ առանձին համաձայնագրեր կստորագրվեն կրթության եւ գիտության նախարարության հետ, իսկ 2019-ի սկզբին՝ համագործակցության մասին համաձայնագիր Կրեատիվ տեխնոլոգիաների «Թումո» կենտրոնի հետ:
Ծրագիրը կիրականացվի 2 ուղղություններով եւ ուղղված կլինի ինովացիոն տեխնոլոգիաների զարգացման խթանմանը ինչպես Երեւանում, այնպես էլ Հայաստանի մարզերում:
«Առաջին ուղղությունն է աջակցությունը արդյունաբերության «կանաչ հատվածի» զարգացմանը՝ գյուղատնտեսություն, տուրիզմ եւ տեխնոպարկեր: Մենք լայն հնարավորություններ կտրամադրենք սթարթափերին եւ այս ոլորտներում գործող փոքր ու միջին բիզնեսին: Երկրորդ ուղղությունն է կրթությունը՝ այս հատվածում դրամաշնորհները կուղղվեն դասաքրքերի, ձեռնարկների հրատարակմանը եւ ուսուցիչների վերապատրաստմանը»,- պարզաբանեց Գոնզալո Սերանոն:
Նա ասաց, որ արդեն մեկնարկել է Կրեատիվ տեխնոլոգիաների «Թումո» կենտրոնի հետ համագործակցությունը, իսկ Համաշխարհային բանկի հետ համագործակցելու դեպքում կխթանվի հայկական դպրոցներում մաթեմատիկայի եւ այլ ճշգրիտ առարկաների դասավանդման խորացումը:
«Ծրագրի իրականացումը կսկսվի հաջորդ տարվա մարտ-ապրիլին»,- նշեց Սերանոն:
