Մի հստակ բացահայտում եղավ բանավեճի ժամանակ՝ Գագիկ Ծառուկյանը հրապարակային հայտարարեց «Լուսավոր Հայաստան» կուսակցության տիրոջ մասին, իսկ «Լուսավոր Հայաստանը» փորձում էր ժողովրդին տեր դարձնել, բայց ժողովրդը նրանց տեր չի լինելու, ժողովուրդը երկրի տերն է։ Այս մասին այսօր՝ դեկտեմբերի 6-ին, Ջրաշենում «Սասնա ծռեր» համահայկական կուսակցության  նախընտրոկան քարոզարշավի ժամանակ հայտարարեց պատգամավորի թեկնածու Պետրոս Մակեյանը՝  խոսելով արտահերթ խորհրդարանական ընտրություններին մասնակցող քաղաքական ուժերի ցուցակները գլխավորող գործիչների հեռուստաբանավեճին, որ տեղի է ունեցել երեկ Հանրային հեռուստաընկերության եթերում:

««Լուսավոր Հայաստանը» հիմնական թիրախը դարձրել էր «Սասնա ծռերին», որովհետեւ մենք նվիրյալներ են հայրենիքին ժողովրդին, իսկ կոսմոպոլիտ, անհայրենիք ջահելները, բնականաբար, «Լուսավոր Հայաստանում» գերակշռող է»,–նշել է նա։

Մակեյանն, այնուամենայնիվ կարծում է, որ դեբատները դրական էին, սակայն հանրությունը չտեսավ մրցակցություն. «Հանրայինի հաղորդավարները, կարծես թե, սպասարկում էին ՀՀԿ-ին, Վիգեն Սարգսյանը բոլորից շատ խոսեց, եւ 2-րդը` «Լուսավոր Հայաստանն» է, իսկ Վարուժան Ավետիսյանին անընդհատ կանխում էին խոսելուց: Ակնհայտ էր, որ օգտվում էին ինչ-որ ակունքից, ինչ-որ տեղից»,–հավելեց նա։