«Հայկական ատոմային էլեկտրակայան» ՓԲ ընկերությանում հայտնաբերված չարաշահումների մասով ձերբակալվածներ չկան։ Այս մասին այսօր՝ դեկտեմբերի 6-ին, կառավարությունում լրագրողների հետ զրույցում ասաց Էներգետիկ ենթակառուցվածքների եւ բնական պաշարների նախարարի պաշտոնակատար Գարեգին Բաղրամյանը։
«Ստուգումները ինչպես ԲԷՑ–երում, այնպես էլ ՀԱԷԿ–ում ու մյուս պետական ընկերություններում շարունակական են լինելու»,–նշեց նա։
Բաղրամյանի խոսքով՝ ՀԱԷԿ–ում ուսումնասիրությունները շարունակվում են, վերլուծության արդյունքում համապատասխան մարմինները կներկայացնեն համապատասխան տվյալները։
Նա մանրամասնեց՝ ՀԱԷԿ–ում հրապարակված չարաշահումը վերաբերում է ընթացիկ նորոգման աշխատանքներին, բացի այն, որ կայանի ժամկետը երկարաձգվում է, ամեն տարի խոշոր նորոգում է իրականացվում է, երբ կանգնում է լիցքավորման։
Ավելի վաղ Հայաստանի Հանրապետության ազգային անվտանգության ծառայությունը հայտնել էր, որ ձեռք բերված նախնական տվյալների համաձայն ՀՀ «Հայկական ատոմային էլեկտրակայան» ՓԲ ընկերության համապատասխան պաշտոնյաների հետ սերտ կապերի մեջ գտնվող անձինք, իրենց կողմից տնօրինվող ընկերությունների միջեւ վերավաճառքի ձեւական գործարքներ ձեւակերպելով եւ ապրանքների իրական գներն այդկերպ ուռճացնելով, ատոմակայանի առաջին դասի անվտանգության սարքավորում համարվող ընդամենը շուրջ 7 մլն ՀՀ դրամ արժեքով պահեստամասերը ՀԱԷԿ-ին 2017-2018 թվականների ընթացքում վաճառել են 33 մլն ՀՀ դրամ գումարով, այդպիսով վատնելով շուրջ 25 մլն ՀՀ դրամ: