Վրաստանի երրորդ նախագահ Միխայիլ Սաակաշվիլին ուկրաինական «Զիկ» (ZIK) հեռուստաալիքի քաղաքական թոք շոուում կդառնա հաղորդավար:
Սաակաշվիլին կվարի «Ջոքերներ: Նախագահ դառնալու ճանապարհ» կոչվող ծրագիրը: Շոուն, որը Ուկրաինայի նախագահի պաշտոնի թեկնածուների մասին ֆիլմ-հետաքննությունների շարք է, եթեր կհեռարձակվի դեկտեմբերի 7-ին, փոխանցում է «Նովոստի-Գրուզիան»:
«Ես գիտեմ, թե նախագահն ինչպիսի հատկանիշներ պետք է ունենա՝ իր քաղաքացիների համար կյանքի արժանավայել պայմաններ ստեղծելու համար: Եվ ես արդեն երկար տարիներ ուկրաինացի քաղաքական գործիչներին լավ եմ ճանաչում: Այս պատճառով ZIK հեռուստաալիքի լրագրողների հետ որոշել ենք թարմացնել ուկրաինացիների հիշողությունը, որպեսզի 2019 թվականին նրանց կատարելիք ընտրությունը միանգամայն գիտակցված լինի»,- ասել է Սաակաշվիլին:
Ներկայումս Սաակաշվիլին Նիդեռլանդներում է: Նա, ամենայն հավանականությամբ, ծրագիրը վարելու է հեռվից: Կիեւի ստուդիայում մոդերատորը կլինի վարող Բոգդան Մաշայը:
