ԱՄՆ նախկին նախագահ Ջորջ Բուշ ավագին, որը մահացել էր նոյեմբերի 30-ին, հինգշաբթի երեկոյան հուղարկավորել են Տեխասում, փոխանցում է «ՌԻԱ Նովոստի»-ն:
«Ամերիկայի Միացյալ Նահանգների 41-րդ նախագահը կննջի Բուշի գրադարանի տարածքում»,- Twitter-ում գրել է Բուշերի ընտանիքի պաշտոնական ներկայացուցիչ Ջիմ Մաքգրաթը:
Քոլեջ Սթեյշն քաղաքում ԱՄՆ 41-րդ նախագահի աճյունը զինվորական պատվով հողին է հանձնվել Տեխասի գյուղատնտեսական եւ մեքենաշինական համալսարանին առընթեր նրա անունը կրող նախագահական գրադարանի տարածքում: Փակ արարողությանը մասնակցել են հանգուցյալի ազգականները, ներառյալ նրա ավագ որդի, ԱՄՆ 43-րդ նախագահ Ջորջ Բուշ կրտսերը, հոգեւորականներ եւ պատվո պահակի վաշտը՝ զինվորական նվագախմբի նվագակցությամբ:
Բուշը կննջի իր կնոջ՝ Բարբարայի կողքին, որը մահացել էր այս տարվա ապրիլին, եւ նրանց դստեր՝ Ռոբինի, որը 1953 թվականին 3 տարեկանում մահացել էր լեյկեմիայից:
Նախկին նախագահի աճյունը Հյուսթոնից Քոլեջ Սթեյշն է տեղափոխվել հատուկ գնացքով: Մինչ այդ Բուշին հրաժեշտ են տվել Վաշինգթոնում՝ դագաղը տեղադրվել էր Կապիտոլիումի ռոտոնդայում, որտեղ նրան հրաժեշտ են տվել հազարավոր ամերիկացիներ, հոգեհանգիստը տեղի է ունեցել մայր տաճարում:
Ջորջ Բուշ ավագը 95 տարեկանում մահացել է նոյեմբերի 30-ին Հյուսթոնում: Նա պետության ղեկավարի պաշտոնը զբաղեցրել է 1989–1993 թվականներին: Բուշի վարած միջազգային քաղաքականությունը նշանավորվել է Պանամայում, Ֆիլիպիններում եւ Պարսից ծոցում անցկացված ռազմական գործողություններով: Բուշ ավագը զբաղեցրել է նաեւ ԱՄՆ Կենտրոնական հետախուզության 11-րդ տնօրենի (1976-1977 թվականներ) եւ ԱՄՆ 43-րդ փոխնախագահի (1981-1989 թվականներ) պաշտոնները: