Երկար տարիների ընթացքում «Օրինաց երկիր» կուսակցության դեմ սեւ փիար է իրականացվել: Այս մասին դեկտեմբերի 7-ին՝ նախընտրական քարոզչության ժամանակ, ասաց «Օրինաց երկիր» կուսակցության ղեկավար Արթուր Բաղդասարյանը:
Նրա խոսքով, դա հանգեցրել է նրան, որ Հայաստանի որոշ հատվածի մոտ կուսակցության մասին սխալ կարծիք է ձեւավորվել:
«Մենք միշտ ակտիվ քաղաքական պայքարի կողմն էինք եւ դեմ էինք ատելությանը: Հուսով ենք, որ Ռոբերտ Քոչարյանի եւ Սերժ Սարգսյանի ռեժիմի տապալումից հետո Հայաստանի քաղաքական կյանքում «Օրինաց երկիր» կուսակցության դեմ սեւ փիարը կդադարի: Այսօր մենք ունենք ազատություն, սա նշանակում է, որ ժամանակն է քննարկել, բանավիճել եւ կարեւոր խնդիրների համար առարկայական որոշումներ ընդունել», - նշեց նա:
Բաղդասարյանն առանձնացրեց մի քանի կարեւորագույն միջոցներ, որոնք պետք է ընդունել նոր խորհրդարանի ձեւավորումից հետո:
«Նախ՝ հարկավոր է Հայաստանից թալանած հարստության մանրամասները պարզելու համար միջազգային հետաքննության մեխանիզմներ ստեղծել: Երկրորդ՝ ավելացնել վարձու, պրոֆեսիոնալ զինծառայողների թիվը: Երրորդ՝ առողջապահության մատչելի համակարգ ներդնել», - ընդգծեց նա:
Հանդիպման վերջում Արթուր Բաղդասարյանը ներկաներին խնդրեց մեկ րոպե լռությամբ հարգել Սպիտակի երկրաշարժի զոհերի հիշատակը:
Նշենք, որ առաջիկա կիրակի Հայաստանում կանցկացվեն արտահերթ խորհրդարանական ընտրություններ:
