Synopsys ընկերությունը 2019-ի հունվարից Գյումրիի տեխնոլոգիական կենտրոնում իր գրասենյակը կբացի: Այս մասին հայտնեց «Հայաստանի ձեռնարկությունների ինկուբատոր» (EIF) հիմնադրամի տնօրեն Բագրատ Ենգիբարյանը՝ դեկտեմբերի 7-ից 8-ը Գյումրիում անցկացվող «Բարձր տեխնոլոգիաների խթանման միջոցով մարզերի ուժեղացումը» խորագրով երկրորդ համաժողովի ժամանակ:
Նրա խոսքով, սա աննախադեպ հաջողություն է Հայաստանի մարզերի համար:
«Առաջին անգամ նմանատիպ անդրազգային ընկերությունը Հայաստանի մարզերից մեկում բացում է իր մասնաճյուղը եւ սա կարող է տպավորիչ օրինակ դառնալ այլ մարզերի համար, այդ թվում Վանաձորի, որտեղ նույնանման տեխնոպարկ է բացվել»,- նշեց Ենգիբարյանը:
Հիշեցնենք, որ Synopsys Inc - Synopsys Armenia մասնաճյուղը Երեւանում գործում է 2004 թվականից: Այն ստեղծվել է Leda Design եւ Monterey Arset ընկերությունների միավորման արդյունքում:
Synopsys Armenia-ն զբաղվում է էլեկտրոնային նախագծման ավտոմատացման, մտավոր սեփականությունների մշակման եւ արտադրության նախագծման ոլորտում գիտահետազոտական եւ ինժեներական աշխատանքներով: