Ներկայումս Հայաստանում են գտնվում ԵԱՀԿ-ից ավելի քան 200 դիտորդներ: Այս մասին 9/40 ընտրական տեղամասում լրագրողների հետ զրույցում ասաց ԵԱՀԿ/ԺՀՄԻԳ դիտորդական առաքելության ղեկավար, դեսպան Ուրսուլա Գաչեկը:
«Այսօր ինձ է միացել դիտորդների շատ մեծ խումբ: Մեզ հետ են ԵԱՀԿ անդամ երկրներից ավելի քան 200 կարճաժամկետ դիտորդներ: Ընդհանուր առմամբ Հայաստան են ժամանել ԵԱՀԿ Խորհրդարանական վեհաժողովի, Եվրոպայի խորհրդի Խորհրդարանական վեհաժողովի, ինչպես նաեւ Եվրախորհրդարանի 70 անդամներ»,- նշեց դիտորդական առաքելության ղեկավարը:
Նրա խոսքով՝ յուրաքանչյուր խումբը կդիտարկի 12-13 ընտրական տեղամասեր, իսկ երեկոյան կհետեւի ընտրական հանձնաժողովների հետ միասին քվեների հաշվարկին:
Ստեղծվել են նաեւ լրացուցիչ խմբեր, որոնք երեկոյան կաշխատեն ընտրական տեղամասերի նյութերով՝ քվեատուփերով, քվեաթերթիկներով եւ չօգտագործված նյութով, նշեց դեսպանը:
«Դիտորդները կգնան տարածքային ընտրական հանձնաժողով՝ հետեւելու, թե տվյալներն ինչպես են մուտքագրվելու համակարգչային համակարգ, եւ արդյոք դա տեղի կունենա՞ ըստ կանոնների եւ միջազգային նորմերի»,- ասաց Ուրսուլա Գաչեկը:
