Ֆրանսիայում «դեղին բաճկոններ» շարժման բողոքի ցույցերի ժամանակ ձերբակալվածների թիվը հասել է մինչեւ 1726-ի: Այս մասին հայտնել է երկրի ՆԳ նախարար Քրիսթոֆ Կաստաները, փոխանցում է ՏԱՍՍ-ը:
Նախարարի թարմացված տեղեկություններով, որոնք ներկայացրել է BFM հեռուստաալիքը, առնվազն 1220 մարդ կալանավորվել է: Ոստիկանությունն ամենաշատ ձերբակալությունները կատարել է Փարիզում: ՆԳՆ ճշտված տվյալներով՝ այստեղ ձերբակալվել է 1150 մարդ, որոնցից 619-ը բանտարկվել է: Ստուգելու ժամանակ նրանցից շատերի մոտ զենք է գտնվել, սակայն նրանցից ոմանց փաստաբանները հայտարարել են, որ իրենց պաշտպանյալները «ցանկացել են վճռական բողոք հայտնել, բայց բռնություն չեն կիրառել»:
Կալանավորվածներից մեծամասնությանը կասկածում են «բռնություն իրականացնելու համար համաձայնության գալու» կամ «հանցագործությունների կատարում հրահրելու» համար:
Ֆրանսիայում շաբաթ «դեղին բաճկոններ» շարժման բողոքի չորրորդ շարքն է անցկացվել ընդդեմ ավտովառելանյութի գների բարձրացման, հարկերի բարձրացման եւ կյանքի թանկության: Փարիզում, Լիլում, Լիոնում, Մարսելում, Նանտում, Թուլուզում եւ այլ քաղաքաներում ցույցերն ուղեկցվել են ոստիկանության հետ բախումներով: Բողոքի ցույցերին մասնակցողների թիվը 125 հազարից անցել է: Փարիզում բախումների ժամանակ տուժել է առնվազն 135 մարդ: