Մեծ Բրիտանիայի վարչապետ Թերեզա Մեյը խորհրդարանականներին զգուշացրել է, որ Բրյուսելի հետ համաձայնեցված Brexit-ի տարբերակին հավանություն տալու մերժումը կարող է հանգեցնել երկրում կայունության կորուստի, ինչպես նաեւ կհրահրի վաղաժամ ընտրությունների սպառնալիք կամ Brexit-ի ամբողջական չեղարկում, փոխանցում է BBC-ն:
«Հույս ունեմ, որ մարդիկ հասկանում են, երբ ասում եմ, որ [Եվրամիության հետ] գործարքի ձախողման դեպքում մենք կհայտնվենք անհայտ ջրերում, ես անկեղծորեն հավատում եմ եւ իրականում վախենում եմ, որ դա տեղի կունենա»,- ասել է Մեյը Daily Mail պարբերականի հետ զրույցում:
«Երկիրը կախված վիճակում կհայտնվի, եւ Եվրամիությունը առանց գործարքի լքելու կամ ընդհանրւապես չլքելու հավանականությունը միագամայն իրական կդառնա»,- շարունակել է նա:
Միաժամանակ, երկրի վարչապետի գրասենյակն իրականությանը չհամապատասխանող է անվանել պարբերականների տեղեկությունները, որ Մեյը նախատեսում է դեկտեմբերի 11-ին նշանակված Brexit-ի հարցով խորհրդարանական քվեարկությունը հետաձգել:
Այս մասին էր մասնավորապես գրել Times-ը՝ պնդելով, թե իբր համախոհները Մեյին խնդրում են Բրյուսելի հետ գործարքի պայմանները եւս մեկ անգամ քննարկել, քանի որ պատրաստ չեն այս տեսքով դրա օգտին քվեարկել: Պարբերականը նաեւ պնդում էր, որ մի քանի նախարարներ պատրաստ են Brexit-ի հարցով երկրորդ հանրաքվե անցկացնել:
Թերեզա Մեյը դեռեւս մեկ ամիս է հասել Եվրամիության հետ համաձայնությանը, որին խոսքը վերաբերում է, սակայն այն դեռ պետք է ստանա խորհրդարանի հավանությունը: