Մարդուն պետք է ժամանակ տալ, որ կարողանա իր ծրագրերը լիարժեք իրականացնել: Այս մասին դեկտեմբերի 9-ին Առինջում 29/29 ընտրական տեղամասում Հայաստանի խորհրդարանի ընտրություններում քվեարկելուց հետո ասաց «Բարգավաճ Հայաստան» կուսակցության առաջնորդ Գագիկ Ծառուկյանը:
Նրա խոսքով՝ իրենց կուսակցությունն ի սկզբանե հանդես է եկել Նիկոլ Փաշինյանի աջակցությամբ: Մենք կարծում ենք, որ Փաշինյանին անհրաժեշտ է ժամանակ տալ: Ընդամենը 7 ամիս է անցել, հարկավոր է սպասել, երբ կձեւավորվի նոր գումարման խորհրդարանը, կառավարության նոր կազմը եւ արդեն դրանից հետո ինչ-որ արդյունքներ պահանջել»,- նշեց նա:
Այն հարցին, թե ինչպես է գնահատում Էդմոն Մարուքյանի գլխավորած քաղաքական ուժի խորհրդարան անցնելու հավանականությունը, Գագիկ Ծառուկյանը կրկնեց իր այն միտքը, որ քաղաքականությամբ պետք է զբաղվեն կյանքում կայացած մարդիկ: «Մարդը պետք է նախ իր անձնական կենցաղը բարեկարգի, հետո նոր արդեն հավակնի լուրջ քաղաքականությամբ զբաղվելուն: Բոլորին հայտնի է, որ ամենահաջողակ քաղաքական գործիչներն են ձեռնարկատերերը»,- շեշտեց Գագիկ Ծառուկյանը:
Հիշեցնենք, որ այսօր Հայաստանում ընթանում են արտահերթ խորհրդարանական ընտրությունները:
