Որ Փաշինյանը ինձ բերման ենթարկելու երազանք ունի, ես կասկած չունեմ, բայց մի քիչ էլ վախենում է. տեսնենք դուխը կհերիքի, թե չի հերիքի. ինքն իրենից էլ է արդեն վախենում: Այս մասին, այսօր՝ դեկտեմբերի 9-ին, քվեարկությունից հետո լրագրողների հետ զրույցում նշեց ՀՀԿ ցուցակի երրորդ հորիզոնականը զբաղեցնող Դավիթ Շահնազարյանը:
«Վանեցյանն ասել է, որ ես մեղադրանքներ եմ հնչեցրել, բայց հիմքեր թե ապացույցներ չկան: Ես հայտարարել եմ, որ Փաշինյանն իրականացնում է «իշխանություն Արցախի դիմաց» քաղաքականություն եւ իմ ասուլիսում ես շատ մանրամասն ներկայացրել եմ այն հիմքերը, այն փաստերը, որոնք միարժեքորեն ապացուցում են իմ այդ ասածը:
Ես իրավական մեղադրանք Փաշինյանին այդ առումով չեմ ներկայացրել: Ինքն իրեն մեղադրել է պետական դավաճանության մեջ, հոդված է դրել իր վրա: Նման տարրեր հավանաբար ԱԱԾ-ն է տեսել Փաշինյանի ասածից հետո:
Ինձ հրավիրել են ԱԱԾ, բայց դա կատարվել է այն բանից հետո, երբ նույն օրը Փաշինյանը հրապարակայնորեն կրկնել էր այդ ամենը եւ ասել, որ ԱԱԾ-ն պետք է զբաղվի ինձնով: Ընդամենը ժամեր անց այդ հրահանգը կատարվել է: Ես Փաշինյանին հրավիրել էի բանավեճի: Նա չի գալիս, որովհետեւ բացարձակ պատասխան չունի իմ ներկայացրած մեղադրանքներին Արցախի հարցում»,-հայտարարեց նա:
Շահնազարյանի խոսքով, եթե ԱԱԾ-ն առանց Փաշինյանի հրապարակային հրահանգի իրեն հրավիրեր, ինքը դա չէր համարի քաղաքական հետապնդում. «Ես պատրաստվում էի գնալ, բայց Փաշինյանի ներվերը չդիմացավ եւ նա հրահանգեց, ու ես արեցի իմ հայտնի ասուլիսը: Բոլոր այն մեղադրանքները հնչել են ասուլիսում, դրանից հետո լրացուցիչ մեղադրանքներ մամուլով հրապարակել եմ»: