Երկուշաբթի Տոկիոյի ոստիկանությունը մեղադրանք է ներկայացրել Nissan Motor Co.-ի տնօրենների խորհրդի նախկին նախագահ Կառլոս Գոնին եւ ընկերությանը՝ այն պատճառով, որ թոփ-մենեջերը 5 տարի Nissan-ի ֆինանսական հաշվետվության մեջ խեղաթյուրել է իր պարգեւատրման մասին տվյալները, հայտնում է NHK-ը:
Մեղադրանքներ են ներկայացվել նաեւ ընկերության նախկին տնօրեն Գրեգ Քելլիին, որը, ինչպես եւ Գոնը, կալանավորվել էր նոյեմբերի 19-ին:
Նոյեմբերի 19-ին կալանավորված Գոնին կասկածում են 5 տարում Nissan-ից ստացած վճարումների գումարի նվազեցման մեջ, որն ընդհանուր կազմում է 44 մլն դոլար: Ընկերության տնօրենների խորհրդի միաձայն որոշմամբ հեռացված թոփ-մենեջերը հերքում է իր մեղքը:
Դրանից բացի, դատախազությունը կասկածում է, որ 3 տարում՝ մինչեւ 2018 թվականի մարտ, Գոնը թաքցրել է Nissan-ից ստացած պարգեւատրումների մի մասը եւս:
Նոր կասկածների մասին հաղորդումները դատախազությանը թույլ են տալիս Գոնի կալանքը երկարացնել եւս 22 օրով՝ առանց գրավի դիմաց ազատվելու իրավունքի, հայտնում է The Wall Street Journal-ը: Դրանից հետո, եթե նոր մեղադրանքներ չհայտնվեն, Գոնը կարող է միջնորդել գրավով ազատվելու համար:
Երկուշաբթի Տոկիոյի սակարկությունների ժամանակ Nissan-ի բաժնետոմսերը գրեթե 30 տոկոսով էժանացել են: