«Լուսավոր Հայաստան» կուսակցությունը ընտրությունների արդյունքների մասին հայտարարություն արեց: Այսօր՝ դեկտեմբերի 10-ին, ասուլիսի ժամանակ, հայտարարությունն ընթերցեց կուսակցության ղեկավար Էդմոն Մարուքյանը:
Հայտարարությունում մասնավորապես ասվում է.
«Հայաստանում անցկացված պատմական ընտրությունները հեղափոխական գործընթացների տրամաբանական շարունակությունն են, հեղափոխական արժեքների կապիտալիզացիան: «Լուսավոր Հայաստան» կուսակցությունը կարեւորում է արդար ընտրությունների անցկացումը եւ շնորհակալություն հայտնում շուրջ 80 հազար ընտրողներին, որոնք իրենց ձայնը տվել են մեր քաղաքական ուժին:
Մենք սա մեր երեքամյա ակտիվ գործունեության հասարակական գնահատականի դրսեւորույմ ենք համարում, ինչպես նաեւ ապացույց, որ Հայաստանի հասարակությունը եվրոպական, իսկապես լիբերալ պետություն կառուցելու պահանջով է հանդես գալիս:
Միեւնույն ժամանակ 2018 թվականի դեկտեմբերի 9-ին կայացած ընտրությունները նշանավորեցին հեղափոխության ավարտը եւ երկրի անցումը՝ համակարգային, բարեփոխումների ինստիտուցիոնալ փուլի, որի ժամանակ խորհրդարանը որոշումների լուծման ընթացքում կոնցեպտուալ մոտեցումներ կունենա զսպող եւ հակակշիռ ուժերի առկայության դեպքում:
«Լուսավոր Հայաստան» կուսակցությունը խորհրդարանական մեծամասնության նկատմամբ գաղափարական ընդդիմություն կձեւավորի: Սակայն մենք մտահոգված ենք, որ անգամ հեղափոխությունից հետո խոշոր բիզնեսի եւ քաղաքականության միաձուլումը մնում են քրոնիկ քաղաքական հիվանդության հետեւանքներ, որի դեմ պայքարը մեր քաղաքական ուժի գերակայություններից մեկն է:
Մենք հավատարիմ ենք մնում մեր արժեքներին եւ սկզբունքներին, որոնք ուղղված են արմատական բարեփոխումների իրականցմանը, ինչպես նաեւ այդ արժեքների շուրջ հասարակության համախմբմանը: Մենք՝ որպես խորհրդարանում միակ ընդդիմություն, որը ձեւավորվել է երկրի համար պատմական ընտրություններից հետո, միշտ բաց ենք համագործակցության համար բոլոր արտախորհրդարանական ուժերի եւ անձանց հետ՝ մեր գաղափարների եւ ծրագրերի շրջանակում»:
