Այս ընտրությունների ամենալուրջ բացթողումներից մեկն այն էր, որ կանայք հազվադեպ էին միայնակ մասնակցում քարոզարշավին: Այսօր՝ դեկտեմբերի 10-ին, ասուլիսի ժամանակ այս մասին հայտարարեց ԵԱՀԿ ԽՎ պատվիրակության ղեկավար Նահիմա Լանջրին: Հիշեցնենք, որ պատվիրակությունը Հայաստանի արտահերթ խորհրդարանական ընտրություններին մոնիթորինգ էր իրականացնում:
«Քաղաքում շրջելով, մենք տեսնում էինք, որ նրանք հազվադեպ են մասնակցում քարոզարշավին, բայց նրանցից շատերը ջանասիրաբար որպես ընտրական հանձնաժողովների անդամներ էին աշխատում»,- նշեց նա:
Նրա խոսքով, թեկնածուների ցուցակները գենդերային քվոտայով 25 տոկոսով էին համապատասխանում:
Այս քվոտան, սակայն խորհրդարանում կանանց ներկայացվածության նույն մասնաբաժինը չի ապահովում, մասամբ այն պատճառով, որ տեղերի կեսը բաշխվում է գերադասելի քվեարկությանը համապատասխան:
Նա նշեց, որ կանայք քարոզարշավին հազվադեպ էին ինքնուրույն մասնակցում եւ ցավալի է, որ նրանցից մի քանիսը գենդերային հեռտորաբանության զոհ էին դառնում:
«Պատմականորեն քաղաքականությունը տղամարդկանց աշխարհն էր, բայց քանի որ կանայք բնակչության կեսն են կազմում, դա պետք է արտացոլվի քաղաքականությունում:
Ես հույս ունեմ տեսնել բարեփոխումներ, որոնք կխթանեն քաղաքականությունում կանանց մեծ թիվը եւ հաջորդ ընտրություններին լիարժեք կերպով կապահովեն ինչպես տղամարդկանց, այնպես էլ կանանց մասնակցությունը», - ասաց նա: