«Լուսավոր Հայաստանի» դեմ «սեւ» փիարը եւ ռեսուրսների տարբերությունը թույլ չեն տվել նրան խորհրդարանական ընտրությունների արդյունքներով երկրորդ տեղում հայտնվել: Այսօր՝ դեկտեմբերի 10-ին, ասուլիսի ժամանակ այս մասին հայտարարեց կուսակցության ղեկավար Էդմոն Մարուքյանը՝ ամփոփելով ընտրությունների արդյունքները:
Մարուքյանի խոսքով, որոշ քաղաքական ուժերի կողմից «սեւ» քարոզարշավը այնուամենայնիվ իր դերն ունեցավ:
«Երբ մարդուն անընդհատ նույն բանն են ասում, անգամ, եթե դա սուտ է, նա սկսում է հավատալ դրան: Մեր դեմ հենց նման տեխնոլոգիա է կիրառվել», - ասաց կուսակցության ղեկավարը:
Մարուքյանը հավելեց, որ երկրորդ կարեւոր գործոնը, որ նրանք միայն երրորդ տեղում են հայտնվել, ռեսուրսներն են:
«Մեր կուսակցության եւ «Բարգավաճ Հայաստան» կուսակցության ռեսուրսներն անհամեմատելի են: Սա խոսում է այն մասին, որ Հայաստանում պահպանվող բիզնեսի եւ քաղաքականության միաձուլումը թույլ չտվեցին մեզ երկրորդ քաղաքական ուժը դառնալ»,- ընդգծեց նա:
Մարուքյանը նշեց, որ այս ամենը վկայում է, որ նրանց կուսակցության դեմ պայքարի ապաքաղաքական մեթոդներ են կիրառվել: Կուսակցության անդամ Գեւորգ Գորգիսյանը նշեց, որ այն վայրերում, որտեղ ԲՀԿ-ն հնարավորություն չուներ իր ռեսուրսները կիրառել, նրա արդյունքներն ավելի ցածր էին:
«Երեւանում մենք երկրորդն էինք: Սա խոսում է այն մասին, որ ԲՀԿ-ն կարողացավ առավել անապահով շրջաններում իր ռեսուրսն օգտագործեով արդյունքների հասնել, իսկ այն վայրերում, որտեղ այդ ռեսուրսը քիչ նշանակություն ուներ, արդյունքներն ավելի ցածր էին»,- հավելեց նա:
Հիշեցնենք, որ դեկտեմբերի 9-ին տեղի ունեցան արտահերթ խորհրդարանական ընտրություններ, որոնց արդյունքում «Լուսավոր Հայաստանը» հայտնվեց երրրորդ տեղում՝ երկրորդ տեղը զիջելով ԲՀԿ-ին: Առաջին տեղում ինչպես սպասելի էր «Իմ քայլը» դաշինքն է:
