Լիոնում կալանավորվել են հանցավոր խմբավորման 22 անդամներ։ Խմբավորումը կազմված է եղել Վրաստանի, Հայաստանի եւ Ադրբեջանի քաղաքացիներից եւ գործել է Ֆրանսիայի ու Բելգիայի տարածքում։ Այս մասին հայտարարել է Վրաստանի կենտրոնական քրեական ոստիկանության տնօրեն Վլադիմիր Բորցվաձեն՝ տեղեկացնում է Գրուզիա-օնլայնը։
Նրա խոսքերով՝ դեկտեմբերի 10-ին Լիոնում անցկացվել է «VORS 69-01» անվանումով հատուկ օպերացիա։ Կալանավորվածների մեջ վրացի երկու «օրենքով գող» կա։
Կասկածյալները թալանելու համար նախապես բնակարաններ են ընտրել, մշակել են այդ բնակարանների վերաբերյալ տեղեկատվությունը, եւ հետո արդեն թալանել են դրանք։ Նրանք նաեւ ավտոմեքենաներ են գողացել, կեղծ փաստաթղթեր պատրաստել եւ թմրամիջոցների առեւտրով զբաղվել։
Կալանավորմանը մասնակցել են Ֆրանսիայի, Բելգիայի եւ Վրաստանի ավելի քան 300 իրավապահներ։