Լոռու մարզի Ստեփանավան քաղաքում այսօր՝ դեկտեմբերի 11–ին, վաղ առավոտյան հրդեհի հետեւանքով զոհվել է 59–ամյա Անուշ Բալասանյանը դստեր՝ Վահանուշ Հակոբյանի եւ 12–ամյա թոռան հետ։ Այս մասին NEWS.am–ին հայտնեցին Ստեփանավանի քաղաքապետարանից։

«Հրդեհի նախնական պատճառը հոսանքի կարճ միացումն է եղել։ Ավելի հստակ պարզ կլինի միայն քննությունից հետո»,– ասացին քաղաքապետարանից։

Նշենք, որ հրդեհի հետեւանքով վնասվածքներ է ստացել Անուշ Բալասանյանի որդին՝ 26–ամյա Դավիթ Հակոբյանը։ Նրա վիճակը կայուն ծանր է։ Ավելի ուշ նա կտեղափոխվի Երեւան։

Ավելի վաղ ԱԻՆ մամուլի ծառայությունը հայտնել էր, որ դեկտեմբերի 11-ին, ժամը 06:33-ին «911» ծառայությանն ահազանգ է ստացվել, որ հրդեհ է բռնկվել Լոռու մարզի Ստեփանավան քաղաքի Աշոտաբերդ թաղամասի 3-րդ շենքի բնակարաններից մեկում:

Պարզվել է, որ հրդեհը բռնկվել է Աշոտաբերդ թաղամասի թիվ 3 շենքի (երկհարկանի փայտյա) բնակարաններից մեկում:

Փրկարարները բնակարանից դուրս են բերել 36-ամյա Վահանուշ Հակոբյանի եւ 59-ամյա Անուշ Բալասանյանի ծխախեղդ եղած դիերը, իսկ 26-ամյա Դավիթ Հ.-ին եւ 12-ամյա Գրիգոր Գրիգորյանին տեղափոխել Ստեփանավան քաղաքի ԲԿ, որտեղ վերջինս նույնպես մահացել է:

Հրդեհը մեկուսացվել է ժամը 07:15-ին, մարվել՝ 07:25-ին: Բնակարանում այրվել են պահարանը, մահճակալը եւ հատակը (մոտ 10 քմ):