Այդ մեքենաները, որոնք հիմա կայանված են Բագրատաշենում, որոնք հիմա ճանապարհին են ու գալու են, հիմնականում այն մեքենաներն են, որոնց ղեկը տեխնիկապես հնարավոր չէ փոխել, իսկ փոխելու դեպքում դառնում են շատ վտանգավոր մեքենաներ։ Այս մասին այսօր՝ դեկտեմբերի 11-ին, լրագրողների հետ հանդիպման ժամանակ նշեց «Ղեկը աջ» նախաձեռնության անդամներից Դավիթ Գասպարյանը:
«Տեսեք, նույն Nissan ֆիրման ունի Skyline մոդել, որն ունի իր ձախ ղեկ անալոգը, որը փոխելը շատ հեշտ է ու անվտանգ, նույն Nissan–ը ունի 7 տեղանոց Elgrand, որը չունի ձախ ղեկ անալոգը։ Այդ մեքենան նույնիսկ Վրաստանում ադրբեջանցի մասնագետները՝ ղեկ փոխողները, ոչ մի գումարի դիմաց չեն ցանկանում ղեկը փոխել, քանի որ իրենք էլ հասկանում, որ դա շատ վտանգավոր է դառնում։ Հիմա այս «Ղեկը աջ» նախաձեռնության անդամների մեքենաները հիմնականում 90 տոկոսով այդ մեքենաներն են, որոնց ղեկը չի կարելի փոխել։
Մենք քանի անգամ դա փաստել ենք, պաշտոնյաները մեզ ուշադիր լսել են։ Հիմա այդ մարդիկ մեզ ուշադիր լսում են, ըմբռնում են ու անում են հակառակը։ Հիմա եկել կանգնել են մի պատնեշի, չենք կարողանում հասկանանք՝ խնդիրը ինչումն է, այդ 800–ից 1000 մեքենան ինչ վտանգավորություն պետք է հանդիսանա Հայաստանի համար, որտեղ կա արդեն 40 հազար աջ ղեկով մեքենա։ Ամբողջ խնդիրը սրա մեջ է»,-ասաց նա:
Դավիթ Գասպարյանի խոսքով, քաղաքացիները հավաքվել են այս նախաձեռնության մեջ, քանի որ նրանք խաբված են. «Մաքսայինի տեղեկատվական տախտակին գրված եւ կախված է եղել, որտեղ նշված է եղել, որ աջ ղեկի արգելքը գործում է ապրիլից մինչեւ հոկտեմբերի 1–ը։ Այդ մարդը սեպտեմբեր, հուլիս ամիսներին գնել է այդ աջ ղեկ մեքենան, որը եկել հասել է Բագրատաշեն, որտեղ նրան ասում են, որ պատին գրվածը չի իրականությունը»:
Մյուս բանախոսը՝ Զոհրաբ Իգրթյանն էլ նշեց, որ մարդիկ, որոնք ձեռք են բերել այդ մեքենաները, դրանք գնել են, քանի որ դրանք մատչելի են ու որակյալ. «Հիմա երբ ղեկը վերասարքավորում են, դա ազդում է գնի վրա եւ որակն էլ նվազում է։ Դրա համար մարդիկ համաձայն չեն»:
