Դեկտեմբերի 10-ին Հայաստանի ԿԸՀ-ն հրապարակել է կիրակի կայացած արտահերթ խորհրդարանական ընտրությունների ստուգված տվյալները:
Ընտրություններին մասնակցել է 1 262 164 մարդ: Ինչպես եւ ենթադրվում էր, համոզիչ հաղթանակ տարավ վարչապետի պաշտոնակատար Նիկոլ Փաշինյանի «Իմ քայլը», որը հավաքել է ձայների ավելի քան 70 տոկոսը: 7-րդ գումարման Ազգային ժողով են անցել նաեւ գործարար Գագիկ Ծառուկյանի «Բարգավաճ Հայաստանը»՝ 8,27 տոկոսվ եւ նախկին խորհրդարանի պատգամավոր Էդմոն Մարուքյանի «Լուսավոր Հայաստանը»՝ 6,37 տոկոսով, գրում է «Նեզավիսիմայա գազետան»:
Ընտրություններում հաջողության հասած բոլոր քաղաքական ուժերը մասնակցել են թավշյա հեղափոխությանը, որի արդյունքում այս տարվա ապրիլի 23-ին ՀՀԿ առաջնորդ Սերժ Սարգսյանը հրաժարական տվեց վարչապետի պաշտոնից:
ՀՀԿ-ն, որը խորհրդանում հավակնում էր իրական ընդդիմություն լինել, դուրս մնաց: Ընտրական 5 տոկոսանոց շեմը հաղթահարելու համար կուսակցությանը չբավականացրեց ընդամենը 0.3 տոկոսը:
ԿԸՀ կողմից հրապարակված արդյունքներից հետո ՀՀԿ-ն միանգամից քննադատական հայտարարությամբ հանդես եկավ՝ նշելով, որ «ընտրություններն անցել են սպառնալիքների, ատելության մթնոլորտում, պետության ղեկավարի անձնական ճնշման եւ սպառնալիքների ֆոնին»:
«Ընտրությունների արդյունքների ճանաչման հարցով կուսակցությունը համապատասխան հայտարարությամբ հանդես կգա», – լրագրողներին հայտնել է ՀՀԿ մամուլի խոսնակ Էդուարդ Շարմազանովը: Նա նաեւ հայտարարել է, որ ՀՀԿ-ն անցում է կատարում նոր կուսակցական փուլ՝ արտախորհրդարանական ընդդիմության եւ այդ համատեքստում «Հանուն Հայաստանի, անվտանգության, քրիստոնեական արժեքների եւ Արցախի (Լեռնային Ղարաբաղ. – «ՆԳ»)» օրինական պայքար է մղելու:
«Փաշինյանի ռեժիմը սպառնալիքներ է ներկայացնում… կառավարության արտաքին քաղաքականությունը Ռուսաստանի հետ հարաբերությունների վատթարացմանն է տանում, ՀԱՊԿ գլախվոր քարտուղարի շուրջ իրավիճակը Հայաստանի անվտանգության համար վտանգներ է ստեղծում» -այսպիսին է նախկին իշխանության դիրքորոշումը:
Եթե ՀՀԿ-ն իրեն արտախորհրդարանական ընդդիմություն է հայտարարել, ապա Ազգային ժողովում իշխանություններին ընդդիմադիր կլինի «Լուսավոր Հայաստանը», որն արդեն նման հայտարարությամբ է հանդես եկել: «Լուսավոր Հայաստանը» ընտրություններին մասնակցող այն քիչ կուսակցություններից է, որն իր ծրագիրը «համարձակվել է» կապել Արեւմուտքի հետ կապերի ընդլայնման եւ բարելավման հետ:
Ճիշտ է, «լուսավորվածներն» ամեն կերպ ընդգծում էին, որ դա չպետք է տեղի ունենա ՌԴ հետ հարաբերությունների վատթարացման, ռուսամետ դաշինքներից՝ ԵՏՄ-ից եւ ՀԱՊԿ-ից դուրս գալու հաշվին:
«Լուսավոր Հայաստանը» նշում է, որ կողմ է Հայաստանի ներկայիս վեկտորի պահպանմանը՝ այն միաժամանակ արեւմտյան ուղղությամբ ուժեղացնելով, ինչն առաջին հերթին ԵՄ հետ գործընկերություն է նշանակում:
ԲՀԿ-ն իր մասին վաղուց է հայտարարել որպես ռուսամետ ուղղվածության կուսակցություն: Ընտրություններից կարճ ժամանակ առաջ ԲՀԿ առաջնորդ Գագիկ Ծառուկյանը Մոսկվա էր եկել եւ հանդիպել Պետական դումայի նախագահ Վյաչեսլավ Վոլոդինի ու Պետդումայում «Եդինայա Ռոսիա» խմբակցության ղեկավար Սերգեյ Նեւերովի հետ: Իսկ մինչեւ ընտրությունները Գագիկ Ծառուկյանը գործընկերության դաշնագիր ստորագրեց Նիկոլ Փաշինյանի հետ, այս պատճառով խորհրդարանում ընդդիմադիր հարձակումները վտանգ չէին խոստանում: Ի դեպ, «Իմ քայլը» դաշինքի հաղթողներին կհաջողվեր իրավիճակը լիակատար վերահսկողության ներքո պահել նաեւ նաեւ առանց ԲՀԿ-ի հետ միության: Դաշինքը տեղերի մեծամասնություն կստանա, իսկ կոնկրետ որքան՝ հայտնի կդառնա մոտ ապագայում:
Միակ բանը, որ կարող էր Փաշինյանի ծրագրերին հակասել եւ նրա հիասթափությունն առաջացնել ընտրողների պասիվ մասնակցությունն էր: Հայաստանի պատմության մեջ առաջին անգամ անցած կիրակի տեղի ունեցան արտահերթ ընտրություններ, եւ պատմության մեջ առաջին անգամ դրանց մասնակցեց ձայնի իրավունք ունեցող բնակչության կեսից պակասը: Դեռեւս կիրակի կեսօրին ցածր մասնակցությունը գրանցել էր հանրապետության ԿԸՀ-ն: Օրվա երկրորդ կեսին աշխուժություն նկատվեց: Հավանաբար, ոչ վերջին հերթին համացանցում Փաշինյանի համապատասխան կոչի հետեւանքով: Եվ այդուհանդերձ, մասնակցությունը մինչեւ 50 տոկոսի չհասավ (48,63 տոկոս): Հավանաբար, որոշիչ եղան 2 գործոն՝ վատ եղանակը,- ամբողջ կիրակի Հայաստանում անձրեւ եւ ձյուն էր տեղում,- եւ ընտրությունների կանխորոշվածությունը՝ Փաշինյանի եւ նրա դաշինքի հաղթանակի հարցում ոչ մի կասկած չկար քվեարկությունից դեռեւս շատ առաջ:
Ի դեպ, Հայաստանում վաղուց չեղարկվել է ընտրազանգվածի մասնակցության ստորին շեմը, եւ բնակչության ցածր ակտիվությունը ոչ մի դեր չի խաղում: Իսկ բուն հաղթողը ոչ մի դժգոհություն չարտահայտեց: Առայժմ ամեն ինչ ընթանում է այնպես, ինչպես եւ նա ծրագրել էր իշխանության գալուց հետո: