Գեներալ Մանվել Գրիգորյանի պաշտպան Արսեն Մկրտչյանը իր պաշտպանյալի առողջական վիճակի վատթարացումը արտառոց չի համարում։ Այսօր՝ դեկտեմբերի 11–ին Երևանի ընդհանուր իրավասության դատարանում լրագրողների հետ զրույցում Մկրտչյանն ասաց, որ այսօրվա նիստին իր պաշտպանյալի արյան մեջ շաքարի քանակը կտրուկ բարձրացել էր, ինչի արդյունքում նրա վիճակը կտրուկ վատացել էր և նրա համար շտապօգնություն էին հրավիրել։
«Մանվել Գրիգորյանի առողջական վիճակի վատացումն արտառոց չէի համարի, քանի որ նա վեց ամիս է՝ գտնվել է փակ տարածքում՝ խցում և նրան մեքենայով դատարան տեղափոխելը պետք է որ նրան այս վիճակի բերեր»,–ասաց նա։
Նշենք, որ հունիսից սկսած տարբեր դատական ատյաններում քննարկվել է Գրիգորյանի խափանման միջոցի հարցը, սակայն Գրիգորյանը ցանկություն չի հայտնել մասնակցելու նիստերին։
Մկրտչյանը նշեց, որ իրենք են համոզել Գրիգորյանին՝ մասնակցելու այս դատական նիստին։
«Դատավորի կանխակալ վերաբերմունքը մեզ առիթ է տվել մտածելու, որ անիմաստ է հիվանդ մարդու դատարան տեղափոխելը»,–ասաց նա։
Նշենք, որ այսօր՝ դեկտեմբերի 11–ին Երեւան քաղաքի ընդհանուր իրավասության դատարանը քննեց գեներալ Մանվել Գրիգորյանի խափանման միջոց կալանքը եւս երկու ամսով երկարացնելու հարցը: Գրիգորյանի խափանման միջոցի վերաբերյալ որոշումը դատարանը կհրապարակի դեկտեմբերի դեկտեմբերի 12–ին։
Հիշեցնենք, որ Մանվել Գրիգորյանը կալանավորվել է հունիսի 19-ին`Երեւանի ընդհանուր իրավասության դատարանի դատավոր Մարինե Մելքոնյանի որոշմամբ: Գրիգորյանին մեղադրանք է առաջադրվել ապօրինի կերպով ռազմամթերք ձեռք բերելու եւ նրա կնոջ` Նազիկ Ամիրյանի, դստեր` Այծեմնիկ Գրիգորյանի, Էջմիածին քաղաքի բնակիչներ Սեյրան Ազարյանի, Արմեն Հակոբյանի եւ այլ անձանց հետ նախնական համաձայնությամբ իրեն պատկանող առանձնատներում պահելու համար, ինչպես նաեւ՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափի ուրիշի գույք հափշտակելու համար: Խոսքը ապրիլյան պատերազմի օրերին ուղարկված օգնությունը յուրացնելու մասին է: