Իրանի պաշտոնատար անձինք երկրում Վրաստանի դեսպան Իոսեբ Չախվաշվիլիին կանչել են ԱԳՆ՝ կապված իրանցի ուղեւորների հանդեպ վրացական իշխանությունների անհարգալից վերաբերմունքի մասին տեղեկատվության հետ՝ հայտնում է Tasnim-ը։
Իրանի ԱԳՆ բարձրաստիճան պաշտոնյան իրենց բողոքն է հայտնել Իրանի որոշ քաղաքացիների դեմ վրացի սահմանապահների ցուցաբերած անհարգալից վերաբերմունքի համար։ Վրաստանի դեսպանը ափսոսանք է հայտնել կատարվածի համար եւ խոստացել է մեկնել Թբիլիսի եւ անձամբ զբաղվել այդ հարցով։
Իրանի ԱԳՆ ներկայացուցիչ Բահրամ Կասեմին նախօրեին հայտարարել էր, որ ներկայիս իրավիճակի պատճառով Իրանի քաղաքացիներին խորհուրդ է տրվում հրաժարվել Վրաստան մեկնելու մտադրությունից։
Ավելի վաղ տեղեկատվություն էր հայտնվել այն մասին, որ վրացի սահմանապահները Թբիլիսի-Իսպահան չվերթի կանանց ստիպել են հանել հիջաբները։
Դեկտեմբերի 2-ին Վրաստանում Իրանի դեսպանությունը հաստատել է Իրանի տասնյակ քաղաքացիների վտարման կամ երկիր մուտք գործելու արգելքի մասին տեղեկատվությունը։