Ստրասբուրգի կենտրոնում կրակոցների հետեւանքով զոհվել է 2 մարդ, վիրավորների թիվը հասել է 11-ի՝ տեղեկացնում է The Local՝ հղում կատարելով ոստիկանությանը։
Ավելի վաղ հայտնի էր դարձել, որ ոստիկանությունը նույնականացրել է հրաձիգին, ով կրակ է բացել Ստրասբուրգի կենտրոնում։ Ֆրանսիայի ՆԳ նախարարը հայտնել է, որ նախկինում նա հայտնի է եղել ոստիկանությանը։ Հրաձիգը թաքնվում է։
Քաղաքապետարանը հայտարարել է, որ տղամարդը սպառնալիք է ներկայացնում անվտանգության համար եւ ներառված է «S file» մարդկանց ցուցակում, որոնք կասկածվում են արմատականության մեջ։
SkyNews-ը հաղորդում է, որ զինվորների եւ հրաձիգի միջեւ փոխհրաձգություն է տեղի ունեցել։ Նա վիրավորվել է, սակայն հասցրել է վիրավորել նաեւ զինվորի, ով Փարիզում 2015թ․ ահաբեկչությունից հետո «Պահապան» գործողության շրջանակում Ֆրանսիայի շրջաններում տեղակայված զինվորականներից է։
Ֆրանսիական դատախազությունը հայտարարել է, որ սպանության եւ ահաբեկչության համատեքստում սպանության նպատակով հարձակման փաստերով հետաքննություն է սկսվել։
Հայտնի է, որ կրակոցները հնչել են քաղաքի կենտրոնում՝ սուրբծննդյան տոնավաճառից։ France Info-ն հայտնել է, որ հրաձիգն օգտագործել է ինքնաձիգ եւ դանակ։
Տեղացի լրագրող Բրունո Պուսարը Թվիթերում գրել է, որ իր փողոցում տասնյակ կրակոցներ են հնչել։ Սկզբում մեկ-երկու, այնուհետեւ ինքը կրակահերթ է լսել։
Եվրոպական խորհրդարանի աշխատակից Էմանուել Ֆուլոնը գրել է, որ քաղաքի կենտրոնում «տագնապ» է, եւ փողոցներով զինված ոստիկաններ են վազում։
Անվտանգության նկատառումներով Եվրախորհրդարանը շրջափակված է։ Օրենսդիրները չեն կարող այն լքել։