Երեւանի ընդհանուր իրավասության դատարանի Շենգավիթի նստավայրում, դատավոր Մեսրոպ Մակյանի նախագահությամբ ընթանում է «Սասնա ծռեր» խմբի 10 անդամների գործով հերթական դատական նիստը։
Հիշեցնենք, որ «Սասնա ծռեր» խմբի 10 անդամների գործով ներկայումս կալանքի տակ են ամբաստանյալներից Արմեն Բիլյանն ու Սմբատ Բարսեղյանը։ 7 ամբաստանյալների նկատմամբ ընտրված խափանման միջոց կալանավորումը փոխվել է՝ պատգամավորների անձնական երաշխավորությամբ, իսկ Պավել Մանուկյանն ազատ է արձակվել 1 մլն դրամ գրավի դիմաց։
Նոյեմբերի 14–ի դատական նիստում ՊՊԾ գնդի գրավման գործով 10 ամբաստանյալները չէին առարկել համաներման դեմ, թեեւ համարում են, որ իրացրել են ապստամբելու իրենց իրավունքը։
Նշենք, որ գործող տուժողներն ու վերջիններիս իրավահաջորդները դեռեւս դիրքորոշում չեն հայտնել համաներման վերաբերյալ:
Հիշեցնենք, որ Ազգային ժողովը հոկտեմբերի 31- ին առաջին ընթերցմամբ ընդունեց Համաներման մասին օրենքի նախագիծը։
Էրեբունի-Երեւանի հիմնադրման 2800-ամյակի եւ Հայաստանի առաջին Հանրապետության անկախության 100-ամյակի առթիվ հայտարարված համաներմամբ նախատեսվում է պատժից ազատել ՊՊԾ գնդի տարածքում հանցագործություն կատարած, վերջիններիս հետ հանցակցած, այդ նպատակով հանցափորձ կամ հանցագործության նախապատրաստություն, հարակից տարածքներում դրանց հետ առնչություն ունեցող հանցագործություն կատարած «Սասնա ծռեր» խմբի այն անդամներին, ովքեր չեն մեղադրվում սպանություն կատարելու մեջ եւ եթե համաներման դրա դեմ չեն առարկում պատանդառված եւ ֆիզիկական վնաս կրած տուժողները: Նշենք, որ համաներումը չի տարածվում ՀՀ ՔՕ 104–րդ՝ սպանության հոդվածի վրա, այդ պատճառով ոստիկանների սպանության մեջ մեղադրվող «Սասնա ծռեր» խմբի անդամներ Արմեն Բիլյանի եւ Սմբատ Բարսեղյանի վրա համաներումը կտարածվի մեղադրանքի մյուս հոդվածներով, այն էլ այն դեպքում, եթե տուժողները չառարկեն։