Ոչ մարտի 1-ին կոալիցիա կազմած ուժերը, այդ թվում ԲՀԿ-ն, ոչ էլ իր ողջ գոյության ընթացքում ընդամենը ձեւական ներկայություն ապահոված ուժերը, որոնք բոլոր հարմար առիթների դեպքում ծռմռվում են իշխանությունների առջեւ, ֆոտոսեսիաներ են անում նրանց հետ, եւ ուղղակի օդ են տատանում, որ ընդդիմության տպավորություն ստեղծեն, չեն կարող լինել ընդդիմություն: Այս մասին, այսօր՝ դեկտեմբերի 12-ին, դատարանում, լրագրողների հետ զրույցում նշեց «Սասնա ծռեր» կուսակցության անդամ վարուժան Ավետիսյանը՝ անդրադառնալով հարցին, թե արդյոք ընդդիմություն համարում է «Լուսավոր Հայաստան» կուսակցությանը:
«Պետք է նկատի ունենալ, որ եթե մեկը ուղիղ օլիգարխիկ ուժ է, ապա մյուսը քողարկված նույնպիսի ուժ է եւ առհասարակ մեր ծրագրից էլ հիշեցում եմ բերում, որ քաղաքական, տնտեսական եւ գործակալական լուրջ համակարգային լյուստրացիայի խիստ անհրաժեշտություն կա: Մինչ այդ մենք չենք կարող ձեւավորել իրապես պետական, ժողովրդավարական կառավարման համակարգ»,-ասաց նա՝ հավելելով, որ իրենք ընդունել են ընտրությունների արդյունքները, քանի որ ժողովրդի որոշումներն անքննելի են:
«Բայց չենք կարող չահազանգել այն վտանգների մասին, որոնք ծառացած են մեր առջեւ: Չենք կարող չասել, որ առանց իրական ընդդիմություն, առանց «Սասնա ծռերի», առանց բեւեռի, բնականաբար, Ազգային ժողովն ու պետական կառավարման համակարն իմունիտետ չի ունենալու, ինչը շատ ցավալի է»,-ընդգծեց «Սասնա ծռերի» ներկայացուցիչը: