ԱՄՆ Ֆլորիդա նահանգի Տալահասի քաղաքի բնակչուհուն մեղադրել են ամուսնուն սպանելու նպատակով սիրեկանի հետ համաձայնություն գալու մեջ, ում կյանքն ապահովագրված էր 1,75 մլն դոլարով, հայտնում է Associated Press-ը:
2000 թվականի դեկտեմբերին Մայք Ուիլյամսը գնացել էր բադի որսի եւ չէր վերադարձել: Խոշորածավալ որոնողական գործողությունն անարդյունք էր եղել՝ չէին գտել ո՛չ անհետացած որսորդին, ո՛չ նրա մասունքները: Ոստիկանությունում հանգել էին այն եզրակացության, որ նա նավակից ջուրն է ընկել եւ խեղդվել, իսկ մարմինը կերել են ալիգատորները:
Կնոջ՝ Դենիզ Ուիլյամսի խնդրանքով նրան դժբախտ դեպքի հետեւանքով զոհված են ճանաչել: Դրանից հետո նրան վճարել են 1,75 մլն դոլար, ինչ չափով ապահովագրված էր ամուսնու կյանքը: 2005 թվականին Ուիլյամսն ամուսնացել է հանգուցյալ ամուսնու լավագույն ընկերոջ՝ ապահովագրական գործակալ Բրայան Վինչեսթերի հետ: Յոթ տարի հետո նրանք բաժանվել են:
2016 թվականին Վինչեսթերը հարձակվել է Ուիլյամսի վրա եւ մեկ ժամ նրան պահել՝ սպառնալով ատրճանակով: Մեկ տարի հետ նա իրեն մեղավոր է ճանաչել մարդուն առեւանգելու համար եւ դատապարտվել 20 տարվա բանտարկության: Հաջորդ օրը հայտնի է դարձել, որ հայտնաբերվել են 17 տարի առաջ անհետացած Մայք Ուիլյամսի մասունքները: ԴՆԹ թեստը հաստատել էր, որ դրանք հենց նրան են պատկանում:
Վինչեսթերը պնդում է, որ ինքն ու Դենիզ Ուիլյամսը 1997 թվականից սիրեկաններ են եւ որոշել են սպանել նրա ամուսնուն: Որպես ապահովագրական գործակալ՝ ինքը տեղյակ էր, որ Մայքի կյանքը ապահովագրված է խոշոր գումարով:
Վինչեսթերը դատարանում հայտնել է, որ ընկերոջը նավակից ջուրն է հրել, փոխանցում է Tallahassee Democrat-ը: Նա հույս ուներ, որ ճահճային ծանր երկարաճիտները նրան հատակը կքաշեն, սակայն որսորդը կառչել էր կոճղից ու սկսել օգնություն կանչել: Այդ ժամանակ ապահովագրական գործակալը նրան հրացանով գնդակահարել էր, բեռնել ավտոմեքենան, տարել խորը փակուղի եւ թաղել հողի տակ:
Դենիզ Ուիլյամսին կալանավորել են 2018 թվականի մայիսին եւ մեղադրել առաջին աստիճանի սպանության, սպանության նպատակով համաձայնության գալու եւ սպանությունից հետո հանցակցելու մեջ: Կինը բոլոր մեղադրանքները հերքում է: Նրա փաստաբանի կարծիքով՝ Վինչեսթերը ստում է հանցագործության մեջ նրա դերի մասին, քանի որ քննության հետ գործարք է կնքել, ինչը նրան թույլ է տվել խուսափել սպանության մեղադրանքից եւ առեւանգման համար առավել խիստ պատժից:
