Արցախի Հանրապետության պաշտպանության բանակի հրամանատար, գեներալ-լեյտենանտ Լեւոն Մնացականյանն իր պաշտոնից ազատվելու մասին դիմում չի գրել: Այս մասին Tert.am-ի հետ զրույցում ասել է ինքը՝ Լեւոն Մնացականյանը:
Ի պատասխան հարցի, թե լուրեր են շրջանառվում իր պաշտոնանկության վերաբերյալ, Լեւոն Մնացականյանն արձագանքեց. «Ես դեռ ոչնչից տեղյակ չեմ»:
Հարցին, թե իր պաշտոնից ազատվելու համար դիմում չի՞ գրել, Լեւոն Մնացականյանն ասաց. «Ես իմ պաշտոնից ազատվելու դիմում չեմ գրել»:
Իսկ Արցախի նախագահի մամուլի քարտուղար Դավիթ Բաբայանը NEWS.am-ի հետ զրույցում անդրադառնալով Լեւոն Մնացականյանի պաշտոնանկության լուրերին, ասաց, որ դեռեւս նման հրամանագիր չկա. «Եթե լինի հրամանագիր՝ կհրապարակենք, չի լինի՝ չենք հրապարակի: հետեւք պաշտոնական լրահոսին»:
Նշենք, որ նախօրեից սոցցանցերում եւ լրատվամիջոցներում տեղեկություններ են շրջանառվում, որ պաշտոնից ազատվել է կամ այսօր կազատվի Լեւոն Մնացականյանը: