Հանրապետությունում սեյսմիկ անվտանգության առումով խոցելի և կրթական գործընթացի համար անհրաժեշտ քաղաքաշինական բարելավման ենթակա է համարվել 425 պետական հանրակրթական դպրոց. ծրագրի շրջանակում նախատեսված է 46 դպրոցների ուժեղացում կամ նորերի կառուցում: Այս մասին, այսօր՝ դեկտեմբերի 13-ին, կառավարության նիստին հայտարարեց տարածքային կառավարման եւ զարգացման նախարարի պաշտոնակատար Սուրեն Պապիկյանը:
Նա ընդգծեց, որ կառավարության որոշմամբ արդեն իսկ հաստատվել է 20 դպրոցների ցանկը, հիմա այսօր հաստատվում է հաջորդ 26 դպրոցների ցանկը:
«Սեյսմիկ անվտանգության առումով խոցելի 26 գերակա դպրոցների ցանկը խնդրում եմ հաստատել և ապահովել կա՛մ վերակառուցումը կամ ամբողջությամբ կառուցումը»,- ասաց Պապիկյանը:
Առաջին փոխվարչապետ Արարատ Միրզոյանն էլ նշեց, որ նոր դպրոցներ կառուցելիս որդեգրվել է մի մոտեցում, որ պետք է կառուցվեն մոդուլային դպրոցներ:
Նրա խոսքով, դրանք եւ էսթետիկապես ավելի լավն է, եւ հոգեբանական մթնոլորտը շատ ավելի նպաստավոր է կրթության եւ երեխաների աշխարհընկալման զարգացման համար նույնիսկ գունային լուծումների առումով:
«Կախված աշակերտների թվից, համայնքից, մոդուլներով կարող են զանազան կառույցներ հավաքվել: Գիտեք, որ ունենք ռազմավարություն՝ կենտրոնացնել համայնքային կյանքը դպրոցների շուրջը, ոչ միայն դպրոցական, այլեւ մշակութային, սպորտային կյանքը: Մոդուլային տարբերակը այս նպատակին է ծառայելու: Ունենք նաեւ որոշում, միայն ծայրահեղ անհնարինության դեպքում կառուցել ավանդական դպրոցներ»,-ասաց Արարատ Միրզոյանը:
ԱԻ նախարար Ֆելիքս Ցոլակյանը հիշեցրեց, որ այսօր կան դպրոցներ, որոնք 4-րդ կարգի վթարային են եւ արգելվում է այնտեղ դասեր անցկացնելը:
Վարչապետի պաշտոնակար Նիկոլ Փաշինյանը հրապարակեց ծրագրում ընդգրկված դպրոցների ցանկը:
