Իսրայելի Պաշտպանության բանակը հինգշաբթի իր վերահսկողությունն է հաստատել Հորդանանի Արեւմտյան ափին Ռամալլահի մուտքերի ու ելքերի վրա, երբ այնտեղ է թաքնվել այն ավտոմեքենան, որը մասնակցել էր իսրայելցիների վրա հաձակմանը, որի հետեւանքով 2 իսրայելի մահացել էր, երկուսը՝ վիրավորվել, փոխանցում է ՏԱՍՍ-ը:
Այս մասին արտասահմանցի լրագրողների համար ճեպազրույցում հայտնել է իսրայելցի զինվորականների ներկայացուցիչ Ջոնաթան Կոնրիկուսը:
«Ներկա պահին մենք վերահսկում ենք Ռամալլահի մուտքերն ու ելքերը,- ասել է նա: - Խոսքը իսրայելցի քաղաքացիական անձանց եւ զինվորականների դեմ ահաբեկչական հարձակման մասին է»:
Ավելի վաղ բանակի մամուլի ծառայությունը հայտնել էր, որ պաղեստինցուն, որը հինգշաբթի Հորդանանի Արեւմտյան ափի մայրուղում կանգառում կրակել էր իսրայելցիների վրա, հաջողվել է փախչել: Զինծառայողները սկսել են նրա որոնումները եւ այս շրջանում ստուգումներ են անցկացնում, հավելել են բանակից:
Իսրայելական սանիտարա-փրկարարական ծառայությունն ավելի վաղ հայտնել էր, որ այս հարձակման հետեւանքով երկու իսրայելցիներ մահացել են, իսկ երկուսը՝ ծանր վնասվածքներ ստացել: Փրկարարները չէին հստակեցրել՝ նրանց թվում զինծառայողներ են եղել, թե քաղաքացիական անձինք: